9 октябрьыште Марий Эл вуйлатыше Юрий Зайцев паша дене Юрино районыш миен коштын. Тушто тудо Россий Президент Владимир Путинын кӱштымашыж почеш федеральный проектла дене келшышын уэмден олмыктымо объект-влакым ончен савырнен да совещанийым эртарен.
Эн ончычак Марьин селасе кыдалаш общеобразовательный школышто лийын. 1972 ийыште чоҥымо тунемме верыште селасе да воктен улшо куд ял гыч 91 икшыве шинчымашым налеш, а школ пеленысе дошкольный группыш куд йоча коштеш.
Тунемме учрежденийыште пужен ыштыме пашам «Тунемме школ системым уэмдымаш» федеральный проект почеш шуктымо. Зданийыште кӱварым, окна блокым, инженер коммуникацийым вашталтеныт, оралте кӧргымат да тӱжвачынат олмыктеныт.
«Президентын программыже кӱлешан задачым шукташ полша. Йоча-влаклан шинчымашым налаш чыла йӧным ыштыме», – палемден Марий Эл вуйлатыше.
Варажым Юрий Зайцев Г.П.Лосев лӱмеш историко-художественный тоштерыште лийын.
Музейын фондшо тошто арверлан моткоч поян, нуным турист йыжыҥым вияҥден колтымаште кучылталтыт.
Тоштерыште уэмден олмыктымо паша 2023 ийыште «Тӱвыра» нацпроектын «Тӱвыра алан» регионысо проектше полшымо дене шукталтын. Тушто леведышым ачаленыт, фасадым, тыгак олтымо, волгалтарыме, электровийым ситарыме системым, кӱварым, пӧлем кокласе пырдыжлам вашталтеныт. Тиддеч посна вӱдым пуымо да канализаций, тыгак пожар деч аралыме системым пашаш колтеныт.
Юрий Зайцевлан тошто арверым, тӱрлӧ кидпашам, Геннадий Павлович Лосевын чумырымо самовар коллекцийжым ончыктеныт. Юрино мланде пеҥгыде да сай качестван пушеҥге гыч изделийым ыштыше мастар еҥ-влаклан поян. Тоштерысе чыла мебельымат районысо мастар-влак ямдыленыт.
Марий Эл вуйлатыше палемден: «Тӱвыра» нацпроект республикысе тоштер, библиотеке, театр, кинозал-влакым жаплан келшышым да утларак йӧнаным ышташ полша.
Совещанийыште районышто кӱлешан йодыш-влакым каҥашеныт.
Регион вуйлатыше муниципальный образований тӱвыралан поян, а тидыже Шереметев замке, чапланыше дворян тукымын историйже дене чак кылдалтын манын палемден. Районым турист-влаклан келшыше кумдык семын веле огыл вияҥдаш, а верысе калыкланат илаш сай йӧным ышташ темлен.
Тӱткылыкым йодшо ик тыгай объектлан Юринысе С.А.Лосев лӱмеш кыдалаш общеобразовательный школ шотлалтеш. 1980 ийыште чоҥалтше оралтым ачалыман, инженер системымат пужен ыштыман.
Марий Эл вуйлатыше палемден, тиде школлан «Тунемме школ системым уэмдымаш» программе дене келшышын 2024 ийыште федерал бюджет гыч субсидийым налаш республик йодмашым колтен. Кызыт документ-влак Россий Федерацийын Просвещений министерствыштыже улыт.
Районышто тӱвыра пӧртым чоҥымо йодышымат тарватеныт. 2015 ийыште негызым пыштеныт, а 2016 ийыште республик бюджетыште шийвундо укелан кӧра чоҥымо пашам чареныт.
Регион вуйлатыше тӱвыра пӧртын кӱлешлыкшым палемден да тиде объектымат федерал программыш пурташ йӧным кычалаш темлен.
«Республикыште лач Юрино муниципальный районышто тыгай объект уке. Усталык коллектив-влак тӱрлӧ вере погынат. Экспертизым ыштыме гыч тӱҥалман да тӱвыра пӧртым чоҥымо пашам шуктыманак», – каласен Юрий Зайцев.
Совещаний жапыштак районысо эмлымверын поликлинике отделенийжым чоҥымо пашам мучашлыме нерген каҥашеныт. Кызыт тӱжвал могырым инженер системым ыштат, тӱзаташ ямдылалтыт. Чоҥымо жап пужалтын, сандене субподрядный организацийым вашталтат. Марий Эл вуйлатыше идалык мучаш марте тиде объектым шукташ кӱлмым палемден.
Марий Эл Вуйлатышын администрацийжын информаций паша пӧлкажын уверже негызеш А.Байкова ямдылен
