Ик ийлан ондак

Марий Эл вуйлатыше Александр Евстифеев 11 ноябрьыште Стратегический вияҥмаш да национальный проект-влак шотышто Россий Федераций Президент пеленысе советын президиумжын заседанийыштыже лийын. Тудым Российын премьер-министрже Дмитрий Медведев элын чыла субъектшын участвоватлымыж дене видеоконференций режим почеш эртарен.

Тушто «Тўнямбал коопераций да экспорт», «Паша лектыш да паша верым ситарымылан полыш», «Изи ден кокла кугытан предпринимательстве да индивидуальный предпринимательский инициативылан полыш» национальный проект-влакым шуктен толмо йодышым ончымо.

Марий Элыште «Тўнямбал коопераций да экспорт» нацпроектым илышыш шыҥдарен толмо кышкарыште, тыгак «Электронный бюджет» системыште Стратегический вияҥмаш, проектный паша да национальный проект ден программе-влакым илышыш шыҥдарыме шотышто  Марий Элым вуйлатыше пеленысе совет 4 региональный проектын паспортшым пеҥгыдемден. Тиде – «Промышленный экспорт», «АПК-н продукцийжым вес эллаш ужалымаш», «Тўнямбал коопераций ден экспортым вияҥдыме системный мере-влак» да «Услуго шотышто экспорт» проект-влак.

«Паша лектыш да паша верым ситарен шогымылан полыш» национальный проектыште республикын участвоватлымыж нерген ойлаш гын, республикым вуйлатысе пеленысе Совет тиде национальный проект почеш 2020-2024 ийлаште илышыш шыҥдарышаш 3 региональный проектым пеҥгыдемден. Тиде – «Паша лектышым кугемдыме шотышто системный мере-влак», «Предприятийлаште паша лектышым кугемден толмо пашалан адресный полыш», «Паша верым ситарен шогымылан полыш да паша лектышым кугемдаш йєным ыштышашлан паша вий рынкын пайдалыкшым кугемдымаш» проект-влак.

Россий Минэкономразвитийын графикше дене келшышын, республик тиде нацпроектым шуктымашке 2021 ийыште ушнышаш ыле, но тушко 2020 ий гыч ушнаш ямдылалтын шумо. Тиде пашаш нацпроектын мероприятийлажым шкевуя шуктен толшо 5 предприятий ушна. Тений сентябрьыште республик дене пырля пашам ыштыме нерген «Марий Эл Дорстрой», «Искож завод» АО-влак, «Йошкар-Ола шыл комбинат» ЗАО, «Марий Картонажный Мануфактур» да «Чоҥаш» ООО-влак коклаште соглашенийым ыштыме.

Нацпроектын «Паша лектыш шотышто лидер-влак» да экспортный акселератор программе-влак почеш «Российский экспортный рўдер» АО негызеш эртаралтше образовательный мероприятийлаштыже участвоватлышашлан тиде предприятий-влак 35 еҥым туныкташ йодмашым пуэныт. Тышеч 27 еҥже тений нылымше кварталыште да 8 еҥже 2020 ийыште икымше кварталыште тунемыт.

Региональный проект-влакын пеҥгыдемдыме паспортышт дене келшышын, 2020-2024 ийлаште финансированийын чыла источникше кўшеш 306,1 миллион теҥгем кучылташ палемдыме, тышеч 292,7 миллион теҥгеже федеральный бюджет гыч да 13,1 миллион теҥгеже республикын бюджетше гыч ойыралтеш.

«Изи ден кокла кугытан предпринимательстве да индивидуальный предпринимательский инициативылан полыш» нацпроект почеш 5 региональный проектым пеҥгыдемдыме. Нуным илышыш шыҥдараш 6 ий жапыште 2 миллиард наре теҥгем ойыраш палемдалтеш.

Тений региональный проект-влакын мероприятийлаштым шукташ чылаже 7,3 миллиард теҥгем колташ да кучылташ лийме. 2020 ийыште 8,4 миллиард теҥге колталтшаш, тышеч 4,5 миллиард теҥгеже – федеральный бюджетын оксаже, республиканский бюджет гыч 2 миллиард теҥге ойыралтшаш.