Марий Эл правительствыште Россий Федерацийын президентше Владимир Путинын Федеральный Собранийлан ыштыме Посланийжын положенийже-влакым республикыште шуктымо шотышто совещаний лийын.
Юрий Зайцев палемден: Посланийыште кугыжанышым да обществым вияҥдыме, пеҥгыдемдыме тӱҥ направлений-влак шотышто стратегический задаче шындалтын.
– Мутат уке, президентын палемдыме задаче-влак шотышто правительствын постановленийже-влак ямдылалтыт, – каласен республик вуйлатыше.
Совещанийыште ойленыт: Посланийыште кугу тӱткыш элым социально-экономически вияҥдымылан да калыклан социальный полышым пуымылан ойыралтын. Совещанийыш погынышо-влак республикын экономический вияҥмашыж, социальный политике, тӱвыра, спорт да туризм, самырык-влакын политикышт да нуным патриотизм шӱлышеш куштымо, специальный военный операцийын участникше-влаклан полышым пуымо дене кылдалтше йодыш-влакым каҥашеныт.
Юрий Зайцев республикын правительствыжлан задачым шынден: Посланий дене келшышын мом ик эн ончыч ышташ кӱлмым палемдаш.
– Президентын Посланийыштыже моткочак кӱлешан решений-влак палемдалтыныт. Нуно илышнам палынак вашталтат, пӱсын шогышо йодыш-влакым чыла сферыште писын рашемдаш полшат, – мучашлен республик вуйлатыше.
Марий Эл вуйлатышын пресс-службыжын уверже негызеш Л. Камалетдинова ямдылен
