Республикысе курчак театрыште Марий Эл вуйлатышын ёлкыжо-влак эртат. Чылаже куд ёлко лиеш.
Икымше пайремыш, 19 декабрьыште, специальный военный операцийыште участвоватлыше-влакын икшывышт чумыргеныт. Йоча-шамычым Марий Эл вуйлатыше Юрий Зайцев саламлен, пӧлекым кучыктен. Варажым йоча-шамыч «Снежная королева» спектакльым онченыт.
У ий пайремыш 1-5-ше класслаште тунемше икшыве-влакым ӱжыныт. Тиде мобилизованный, доброволец, СВО-што вуйым пыштыше да тушто участвоватлыше-шамычын ӱдыр-эргышт. Тылеч посна олимпиадылаште сеҥыше ден призёр, тунеммаште, спортышто, тӱрлӧ конкурсышто усталыкым ончыктышо ӱдыр-рвезе-шамыч чумыргат.
Марий Эл вуйлатыше Ю.Зайцев «Кумыл кож» всероссийский акцийышкат ушнен. Эн ончыч тудо Шернур район гыч Настя Элембаеван кожышто кечыше шаржым налын. 11 ияш ӱдыр У ийлан коньким вуча.
Волжск ола гыч Дарья Веденеева смарт-шагатым, а Марий Турек район гыч 16 ияш Сония Смоленцева алмаз мозаике наборым кучыкташ йодыныт. Юрий Зайцев тыгак кум ияш Кириллын кумылжым шукташ сӧрен. У ийлан тудо велосипедым вуча. Рвезе ака ден изаж нергенат монден огыл, нуныланат пӧлекым йодын.
«Кумыл кож» акцийын организаторжо – йоча ден самырык тукымын «Движение первых» россий толкынышт. Акцийыш тазалык шотышто ойыртемалтше 3-17 ияш, тулык, ача-аван полышыж деч посна кодшо, ЛНР-ште, ДНР-ште, Запорожье ден Херсон областьлаште илыше йоча-влак, военнослужащий ден СВО-што участвоватлыше-влакын ӱдыр-эргышт ушнат.
Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен
