6 февральыште Козьмодемьянскысе лицейын пырдыжешыже ты тунемме заведенийын выпускникше Леонид Рыжовлан почётан оҥам пижыктеныт.
Леонид Владимирович икымше кече гычак специальный военный операцийыште участвоватла. Тудын командоватлымыж почеш россий военный-влак, ВСУ-н обороныжым шалатен, Донбассын ужашыжым утарен налыныт. Тыге Россий армийлан Лисичанскыш каяш йӧн почылтын.
Патырлыкым, героизмым ончыктымыжлан Леонид Рыжовлан Россий Геройын «Шӧртньӧ шӱдыр» медальым пуышаш улыт. Леонид Рыжов – Луганск Калык Республикын Геройжо.
Почётан оҥам почмо торжественный мероприятийыште Марий Элын вуйлатышыже Юрий Зайцев лийын.
– Леонид Рыжов – чын патриот, патырлыкше дене шукылан пример. Мемнан Отечествына шке геройжо-влак дене эреак чапланен. Нуно тӱрлӧ улыт, но нуным икте уша – элым йӧратымаш. Мый ӱшанем, Российын Геройжо Леонид Рыжов рвезе-шамычлан илыш корныштышт пример лиеш, – манын Ю.Зайцев.
Варажым регион вуйлатыше лицейын класслаж ден пӧлемлажым ончен лектын. Тудлан 10-11 класслаште тунемше-влаклан келыштарыме инженерный классым ончыктеныт. Тушто Юл кундем кугыжаныш технологический университет, «Потенциал» завод полшымо дене ешартыш программе почеш тунемыт. Эртыше кеҥежым «Потенциал» завод школлан кок миллион теҥге оксам ойырен. Тудын дене физике кабинетым олмыктат да тачысе кечылан келыштарат.
Марий Эл вуйлатышын пресс-службыжын уверже негызеш Елена Эшкинина ямдылен
