|
«Гараж амнистий» шуко йодышым луктын
13.09.2021
1 сентябрьыште
Гаражым да тудын йымалнысе мландым простаҥдыме радам дене шке ӱмбак
(собственностьыш) возыкташ лийме федеральный закон вийыш пурен. Тудын пашам
ыштыме икымше арня рашемден: регионысо калыкым «гараж амнистий» шотышто правам
пеҥгыдемдыме йодыш тургыжландара. Лач тидын нерген 8 сентябрьыште Росреестрын Марий
Элысе виктемжым вуйлатыше Елена Галеева Марий Элым вуйлатыше Александр
Евстифеевлан каласкален.
– Закон 2026 ий 1 сентябрь йотке вийыште лиеш. Тиде жапыште калык 2004 ий марте чоҥымо гаражшым палынак проста радам дене шке ӱмбакыже возыктен кертеш. Гараж-влакын тӱҥ шотышто олаште улмыштым шотыш налын, эртыше арнян мэрийыште кугу совещанийым эртарышна. Тушто гараж кооператив-шамычын 20 утла председательыштлан тиде законын ойыртемже-шамычым умылтарышна. Материалыштына граждан-влакын правам пеҥгыдемдыме радамыштым ончыктышна. Йодыш-шамыч лектыт гын, ме верлашкат, поснак гараж кооперативлашке, лекташ да законым умылтараш ямде улына», – рашемден Е.Галеева Республикым вуйлатыше А.Евстифеев граждан-влакым у закон дене жапыштыже палдараш да калыклан тудын дене пайдаланаш тӱҥалаш кӱлмым палемден. «Конешне, вияш кыл кӱлеш, молан манаш гын йодыш шуко, да граждан-шамычат профессионал-влакын каҥашыштым кумылын колыштыт», – манын регионым вуйлатыше. Вашлиймаште илыме верым чоҥаш лийме мланде нергенат мутланеныт. Ведомство пайдалын огыл кучылтмо мланде участке-влакым рашемдыме да нуным илыме верым чоҥаш ойырымо пашам чарныде шуктен шога, палемден Е.Галеева. «Мемнан ыштыме функционал федеральный надзор маналтеш, верлаште муниципальный контроль кодеш. Муниципалитетлаште идалык мучаш марте муниципальный контроль нерген положений-влакым ыштышаш улыт, да нуно вес ий гыч вийыш пурат», – каласен Росреестрын Марий Элысе виктемжым вуйлатыше. Тиде йодышым шуйкалаш огеш лий да чылажымат законын кышкарыштыже ышташ кӱлеш, палемден А.Евстифеев. Вашлиймашын участникше-влак умбакыжат пашам пырля ышташ кутырен келшеныт. |
«Гараж амнистий» шуко йодышым луктын
