Марий Элым вуйлатыше Юрий Зайцев тиде кечынак ФС-ын Экономический политике шотышто комитетшын председательже Андрей Кутепов дене вашлийын.
Тиде комитетын кумдаҥдыме заседанийыштыже тудо республикын инициативыже-влакым сенатор-шамычын сайлан шотлымышт да полшаш сӧрымышт пеш кӱлешан манын палемден. Вараже Марий Эл правительстве председательын алмаштышыже Дмитрий Троицкийын докладшым колыштыныт. Тудо республикын инвестицийым ушаш йӧнан улмыжым палемден, тӱҥ отрасль-влакым вияҥдымаште шумо сеҥымаш дене палдарен.
Республик правительстве председательын алмаштышыже Александр Сальников Федераций Советын Аграрно-продовольственный политике да пӱртӱс дене пайдаланыме шотышто комитетшын кумдаҥдыме заседанийыштыже лийын. Тушто Марий Эл Республикын ялозанлыкшым умбакыже вияҥдыме йодышлам каҥашеныт.
Регламент да парламент пашам виктарен колтымо шотышто комитетын кумдаҥдыме заседанийыштыже Марий Эл правительстве председательын алмаштышыже Дмитрий Троицкий республикыште шуктен толмо контрольно-надзорный паша дене кылдалтше йодыш-влакым тарватен.
Ты кечынак Федераций Советын Социальный политике шотышто комитетшын кумдаҥдыме заседанийже лийын. Тушто республикыште социальный сферым, спорт ден туризмым вияҥдыме кӱлешан йодыш-влакым ончымо. Заседанийын пашаштыже Марий Эл правительстве председательын икымше алмаштышыже Евгений Кузьмин участвоватлен.
Федераций Советын Науко, образований да культур шотышто комитетшын кумдаҥдыме заседанийыштыже Марий Эл правительстве председательын икымше алмаштышыже Михаил Васютин лийын. Тушто республикыште образований ден культур сферыште кызытсе жаплан келшыше инфраструктурым ыштыме дене кылдалтше йодыш-влакым ончымо.
Конституционный законодательстве да кугыжанышын ышталтмыже шотышто комитетын заседанийыштыже муниципальный образованийын илышышкыже цифровой сервисым шыҥдарыме сай опытым каҥашыме да тудым Марий Эл Республике мучко шараш темлыме.
Ххх
24 октябрьыште Марий Элым вуйлатыше Юрий Зайцев Федераций Советыште республикын выставочный экспозицийжым ончен савырнен. Тудо СМИ-н еҥже-влаклан пуымо интервьюштыжо регионын шумо сеҥымашыжым да умбакыже вияҥаш кугу куатше улмым палемден. Марий Элын уло мо дене кугешнаш да умбакыже вияҥаш манын каласен Юрий Зайцев.
Регионым вуйлатыше республикын делегацийжын профильный комитетлаште ыштыме пашажын лектышыж дене палдарен, шуко инициативым поддержатлыме да нуным Федераций Советын председательже Валентина Матвиенкон участвоватлыман пленарный заседанийыште умбакыже каҥашаш тӱҥалыт манын.
ххх
25 октябрьыште Федераций Советын председательже Валентина Матвиенко ден Марий Элым вуйлатыше Юрий Зайцев вашлийыныт. Тидын годым нуно регионым социальный ден экономике велым вияҥдыме йодышлам каҥашеныт.
Мутланымаште тыгак Федераций Совет председательын алмаштышыже Константин Косачев ден СФ-н Обороно да лӱдыкшыдымылык комитетшын председательжын икымше алмаштышыже Сергей Мартынов участвоватленыт.
Россий парламентын кӱшыл палатыжын спикерже республикын правителствыжын пашажым кӱкшын аклен.
«Ме тылеч ондак перинатальный рӱдерын корпусшым чоҥымым, аэропортым пужен уэмдыме пашан икымше йыжыҥжым поддержатлышна, тидыже республикын Москва да моло регион дене кылжым саемда. Ончыкыжат чулымын полшен шогаш тӱҥалына»,– каласен Валентина Матвиенко.
Марий Элым вуйлатыше республикын шумо сеҥымашыжым ончыкташ, калыкын проблемылаж нерген каласкалаш, умбакыже вияҥшашлан решаштлаш кӱлмӧ задаче-влакым рашемдаш да сенатор-влакын полшаш сӧрымыштым колаш йӧным пуымылан Федераций Советын председательжылан тауштен.
«Мый Марий Эл Республикым вияҥдымашке да пеледыктымашке тендан пыштыме надырдам да сенатор-влакын – Константин Иосифович Косачев ден Сергей Александрович Мартыновын надырыштым кӱкшын аклем да регионлан полшен шогымыланда тауштем. Тыге полшен шогымо годым ме гражданна-влакын илышыштым саемдаш, у сеҥымашке шуаш кумылаҥдыше, сай ончыкылыкым сӧрышӧ проект-влакым илышыш шыҥдарен кертына»,– каласен Юрий Зайцев.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
