Федеральный проект почеш

Марий Элыште Красный Стекловар психоневрологический интернатын илыме корпусшо «Демографий» нацпроект дене келшышын чоҥалтеш. Марий Эл вуйлатыше Александр Евстифеев тушко 15 августышто миен коштын. Социальный учрежденийын 100 веран у зданийже «Демографий» национальный проектыш пурышо «Кугурак тукым» федеральный проект дене келшышын чоҥалтеш.

Республикым вуйлатыше интернат кундемым ончен савырнен, чоҥышо-влак дене мутланен. «Морко ПМК» производственный кооперативын председательже Борис Захаров республик вуйлатышылан тыге ўшандарен каласен: нунылан чоҥаш сай условийым ыштыме, чыла паша жапым ончылтен шукталтеш.

Психоневрологический интернатын илыме корпусшым 2020 ийыште чоҥен шукташ палемдыме. Кызытеш пашан икымше йыжыҥжым шукташ 51 миллион теҥгем ойырымо. Объектын чумыр кумдыкшо – 2,5 тўжем наре квадратный метр.