11 ноябрьыште Марий Эл вуйлатыше Юрий Зайцевын эртарыме совещанийыште Йошкар-Олаште «Лӱдыкшыдымӧ ола» аппаратно-программный комплекс видеонаблюдений системым ончыкыжым кузе вияҥдышаш нерген мутланеныт.
Тушто палемденыт: рӱдолаште вераҥдыме видеонаблюдений тӱрлӧ правонарушенийым ыштымым шижтараш да рашемдаш чот полша. Тыгак тудым вараже оперативный пашаште кучылташ лиеш.
Ведомствылаште да объектлаште вераҥдыме камер-влак деч посна видеоэскерымаш «Лӱдыкшыдымӧ ола» комплексный системе полшымо денат шукталтеш. Тыгак муниципальный видеонаблюдений системе кучылталтеш. Тудын дене келшышын 98 камер пашам ышта.
Юрий Зайцевын кӱштымыж почеш тений августышто эше 5 камерым ешарыме. Нуным йӱмӧ заведенийла воктеке вераҥдыме. Йошкар-Олан мэрже Евгений Масловын ойлымыж почеш, кызыт тыгай сынан 40 наре заведений кумдык турашке камерым сакышаш нерген видеонаблюдений системе услугым пуышо организаций-влак дене ак шотышто мутланымаш кая.
Эшежым «Уфанет» компанийын онлайн камерже-влакым кӱкшӧ зданийлашке да шуко калык коштмо урем ден нунын ушнымашкышт вераҥдыме.
Олаште видеоэскерымашым вияҥдышашлан, а тудын тӱҥ задачыже – общественный лӱдыкшыдымылыкым кугемдымаш, Марий Эл вуйлатыше Юрий Зайцев тидын дене кылдалтше йодыш-влакым каҥашаш пашаче группым ыштыме нерген каласен. Тушко республикысе Элкӧргӧ паша, Чоҥымо паша, архитектур да илыме вер ден коммунал озанлык, Транспорт да корно озанлык, Цифровой вияҥмаш, Финанс министерствыла, Гражданский обороно ден калыкым аралымаш комитет, Йошкар-Олан администрацийже да «Лӱдыкшыдымӧ ола» кугыжаныш бюджет учреждений гыч еҥ-влак пурталтыт.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
