8 февральыште Марий Элыш РФ Кугыжаныш Думо председательын алмаштышыже Анна Кузнецова толын каен.
Паша радамже Марий Элын Мер полыш штабыштыже икмыняр мероприятийым эртарыме дене тӱҥале. Тиде полатым ончен савырнымеке, тудо «Ассамблея народов России» организацийын эртарыме вашлиймаштыже лие.
«Еш квартирник» площадкыште кужунрак кучалте. Тушко ныл еш толын ыле. Мутлан, Йошкар-Ола гыч вате-марий Артёмовмыт волонтер еш улыт. Нуно кок икшывышт дене пырля «Сердце матери» фондлан салтак-влаклан мо кӱлмым ышташ, чумыраш полшат.
Марий Оньыжа Эдуард Александров ешыже – пелашыже да кок йыгыр ӱдыржӧ – дене толын. Нуно ешыштышт марий шӱлышым, марий йӱлам арален кодымышт нерген каласкалышт. Тыгак Эдуард Васильевич кугу тӱткышым йоча-влакым шуарымаште патриотизм шӱлышлан ойырымышт нерген палдарыш.
А эше кок еш гыч ача ден эрге гына толыныт ыле. Анна Кузнецова нунымак посна палемдыш. Могай амал дене? Коктынжо Александр Юнганс ден Даниил Орешкин, СВО-н участникше улыт. Нуным патриотизм шӱлышеш ончен-куштымыштлан тауштен, ачаштлан – Сергей Рудольфовичлан да Сергей Валериевичлан «Отец солдата» наградым кучыктыш.
Марий Элын Мер полыш штабыштыжак Анна Кузнецова еҥ-влаклан личный приемым эртарыш. Тушко кажныже тӱрлӧ тургыжландарыше йодыш дене толын ыле. Мутлан, Савино села гыч Ирина Соловьева дене мутым вашталтышым. Александр пелашыж дене ешышкышт икмыняр йочам ашнаш налыныт. Нунын кокла гыч южышт тулык улыт. Да лач нине икшывыланак кеҥеж канышым эртараш республикысе кучем кузе полшен кертме нерген ава рашемдаш толын.
А весыштым школ, корно дене кылдалтше йодыш-влак тургыжландареныт. Тидын нерген пресс-подход годым журналист-влаклан Анна Кузнецова шкежат каласыш.
Мер полыш штаб деч вара Анна Кузнецова Марий Эл вуйлатыше Юрий Зайцев дене правительстве пӧртыштӧ вашлийын.
Республик вуйлатыше дене нуно, мутлан, Марий Элыште демографий политикым саемдыме дене кылдалтше йодыш-влакым да Еш идалыклан пӧлеклалтше мероприятий-влакым эртарыме планым каҥашеныт.
Юрий Зайцев Анна Кузнецовалан республиклан тӱткышым ойырымыжлан тауштен да палемден:
– Тендам уэш Марий Элыште вашлияш мылам куанле. Кызыт ме республикыште еш да икшыве-влаклан могай региональный полышым пуышашым каҥашена. Тидын шотышто Тендан дене мутланынем: могай полыш эше кӱлеш? Ала Те вес регион-влакын опытышт дене пайлалтыда. Мыйын шонымаште, пӱтынь эл мучко полыш икгай лийшаш. Президентын указше шукталтшаш, а мый республик вуйлатыше да айдеме семынат ты шотышто кугу ответственностьым шижам.
– Те чын палемдышда: кызыт регионысо чыла политикым Президентын указшылан келыштарышаш улыда. Шуко шочшан еш-влаклан полшымо шотышто тудо кӱкшытым чот нӧлталын. Кузе регионышто документ-влак ямде лийыт, туге еш-влак полышым налаш тӱҥал кертыт. Шке велым ме чыла шотыштат полшаш ямде улына. Региональный решений-влак кокланже федеральный лийыт, сандене нормативный документ-влакым тӱткынрак ончаш манын, Кугыжаныш Думышто лӱмынак фракций-влак кокласе пашаче группым ыштенна, – каласен Госдумо председательын алмаштышыже.
Анна Кузнецова студент ешлан социальный няньым ойырымым жаплан келшышылан да ончыкыжым кугу йодмаш дене пайдаланаш тӱҥал кертше семын аклен. Тудын шонымыж почеш, Марий Элыште военнослужащий-влаклан социальный полышым пуымо региональный мере семын илышыш пуртымо практике ончыкыжым кумдаҥдалтын да студент-влакын ешлаштыштат кучылталтын кертеш.
– Таче наукын кечыже улмым шотыш налын, студент еш-влак нерген ойлымо шуэш. Ме студент ешым палемдыме, нунылан могай полышым пуаш лийме шотышто пырля у йӧным кычал кертына, – каласен Анна Кузнецова.
Вашлиймаште тыгак специальный военный операцийын участникше-влак ден нунын ешыштлан полыш мерым эшеат саемдаш кӱлмӧ нерген мутланеныт.
– Мый палем, Марий Элыште полыш мере шуко ышталтеш. Южышт дене федеральный кӱкшытыштат палдареныт. Тиде моткочак чын да кӱлешан темлымаш-влак лийыныт. СВО участник-влаклан, нунын ешыштлан кузе полшаш лийме шотышто тунам регионлаште эше йӧным кычалыныт веле. Коеш, тендан дене ты шотышто паша ышталтеш да полшымо, пырля эшеат у йӧн-влакым кычалме шуэш, – каласен РФ Кугыжаныш Думын вице-спикерже.
Анна Кузнецова тыгак палемден: Еш идалык шуко шочшан еш-влаклан полшымо шотышто у шӱкалтыш ошкыл лиеш. Ойлымыж почеш, ты шотышто ешан да шуко шочшан пашаеҥ-влаклан полшышо программым илышыш пуртышо предприятий-влакын практикышт оҥай.
– Тиде регионышто специалист-влакым кодаш да тыгодымак нунын ешыштлан полшаш йӧным ышта. Ешлан полыш – Российлан полыш, – ойлен тудо.
– Республикыште еш-влаклан 40 наре тӱрлӧ полыш пуалтеш. 2024 ийым Еш идалыклан увертарымым шотыш налын, ме шкенан региональный инициативынам тений илышыш пурташ тӱналына. Кызыт «Всей семьей» проектым илышыш шыҥдарена. Тудо еш-влакым шукырак жапым пырля эртараш – киношко, курчак театрыш, ече дене мунчалташ миен толаш кумылаҥда. Ме еш-влаклан полшаш, еш йӱлам арален кодаш да пеҥгыдемдаш виктаралтше тӱрлӧ мероприятийым эртараш палемденна, – каласен Марий Эл вуйлатыше.
8 февральыште Россий наукын кечыже палемдалтын. Тидым шотыш налын, тылеч вара Анна Кузнецова Марий кугыжаныш университетыште вуз вуйлатыше-влак да республикысе шымлызе династий-влак дене вашлийын.
Тыгак тудо Марий да Йошкар-Оласе митрополит Иоанн, самырык-влак дене мутланен, Марий Элыште шукерте огыл почмо Православный верам кучышо ӱдырамаш-влакын ушемыштын ыштышаш пашаштым каҥашымашке ушнен.
Любовь Камалетдинова
М.Скобелевын фотожо
