Марий Эл вуйлатыше Юрий Зайцев паша дене Казаньыш миен да ойыртемалтше посна экономике кундемлаште лийын.
Ик тыгай кундемже «Иннополис» маналтеш. Тудым регионыш инвестицийым савырышашлан да IT-технологийым вияҥдышашлан ыштыме. Посна экономике кундем резидент ден партнёр-влаклан налог да таможньо шотышто льготлан, страховой взнослан да моло йодыш дене правам пуа. А тусо университет ден робототехнике рӱдерыште увер технологий да робот шотышто специалистым ямдылат, шымлыме да разработкым ыштыме пашалан кумылаҥдат.
Марий Эл гыч делегаций тыгак «Химград» технополисыште лийын. Тудым 300 утла компанийлан пашам ышташ йӧнештарыме. Нуно промышленный НИОКР, технологий коммерций, пашаеҥ резервым ямдылыме йодыш дене проектлам илышыш пуртен шогат. Технопаркыште экспериментальный лабораторий, инжиниринг рӱдер ышталтыт, стажёрым ямдылыме опытный площадке уло.
Юрий Зайцев палемден: Марий Эллан пошкудо республикын инвестицийым савырыме да IT-технологийым вияҥдыме опытышт пайдале. Тыгай проектлам пырля шуктен толмаш эшеат пайдалырак лиеш. Вет Марий Элынат ты шотышто опытшо изи огыл. IT-сфере компаний-влакын продуктышт онлайн-тунеммашлан, унагудо бизнеслан, финанс расчётлан тӱнямбал кӱкшытан эн сай платформо радамыш пурат. Республикыштына 130 утла IT-компаний шотлалтеш. Кум ий жапыште IT-сфере организаций-влакын пашаеҥышт кум пачаш ешаралтын.
