Ешартыш чарак-влакым пуртат

Тидын нерген таче регионын тазалыкым аралыме министрже Марина Панькова Марий Элым вуйлатыше Александр Евстифеевлан увертарен.

«Ковид дене черланыме чотын кугеммыже элна мучко палдырна. Чаманаш гына кодеш, тиде ситыдымаш республикнамат ӧрдыжеш коден огыл, сандене эрла регионысо штабын заседанийжым эртараш ямдылалтына. Чарак-влак дене кылдалтше указын у редакцийже шотышто ынде икмыняр кече пашам ыштена. Нине мерым ыштыде огына керт, вет мыланна республикыште илыше калыкын тазалыкшым арален кодаш кӱлешан. Сандене коронавирус дене кучедалме шотышто регионысо штабын эрла эртараш палемдыме заседанийжылан тиде темым мучаш марте лончылен шуктена да кызытсе сӱретым саемдаш полшышо ошкыл-шамычым палемдена», – манын А.Евстифеев.

Тазалыкым аралыме аланысе сӱрет дене палдарымыж годым М.Панькова республикыштына эпидситуацийын начаремын толмыж нерген ойлен. Тидыже эн ончычак черле-влакым стационарлашке эмлалташ пыштыме кугытышто коеш. 11 октябрьлан налмаште 10 медорганизацийыште у коронавирус инфекций дене черланыше-влаклан медицине полышым пуымо 1735 койкым ойырымо. Пытартыш кум кечыште гына тудын чотшым 170 койкылан кугемдыме.

Министрын мутшо почеш, пытартыш 10 кечыште эмлымверлашке суткаште кокла шот дене  141 черлым пыштат. Черын келгыш кайымыжат пашам нелемда. Тидыже вирусын ОРЗ дене черланымым ушештарымыж дене умылтаралтеш, да граждан-шамыч медицине полышым вараш кодын йодын толыт.

Кислород полшымо дене шӱлышӧ-влак 50-60 процентлан ешаралтыныт, ешарен М.Панькова. Тидлан кӧра кислородын роскотшат суткаште 8 гыч 11 тонн марте кугемын. ИВЛ-аппаратыш пыштыме пациент-влакынат чотышт кугемын. Мутлан, теҥгече шодым искусственно вентилироватлыме йӧн дене 59 черле шӱлен.

«Эн шуко еҥ Йошкар-Олаште да Медведево районышто черлана. Рӱдолаште суткаште кокла шот дене 95 еҥым стационарыш пыштат. Волжск олаште да Волжский районыштат сӱрет тургыжландарыше. Звенигово районысо рӱдӧ больницыште койко чотым 150 марте кугемдыме, Козьмодемьянск район-влак кокласе эмлымверыште – 85 гыч 120 йотке. Вӱргече гыч изарня марте Йошкар-Оласе городской больницыште эше 60 койкым ойырена, да тиде чыла огыл. Лишыл жапыште черланыше-влакын чотышт тыгакак кугемеш гын, медицине полышым экстренный радам дене веле пуаш логалеш», – манын М.Панькова.

Марий Элым вуйлатыше А.Евстифеев таче вакцинацийын кузерак эртымыж нерген йодыштын да тудым писемдаш кӱлмым палемден.  

Роспотребнадзорын Марий Элысе виктемжым вуйлатыше Светлана Булатоват республикысе эпидситуацийын моткочак тургыжландарыше улмыжым палемден. Калыкын арня еда черланыме показательже ончычсо семынак кугу кӱкшытыштӧ. Тидыже регионыштына индийский штаммын але «Дельта» штаммын шарлымыж денат чак кылдалтын.

Таче кечылан эпидемиолог-влак чер ылыжман 1584 илыме верым эскерат. Тылеч посна нуно предприятийлашке, тӧнежлашке да организацийлашке инфекцийым кондымо 120 случайым регистрироватленыт. Черле дене кылым кучышо 2637 утла еҥымат эскерат.

Республикышкына йот элла гыч толшо граждан-влакым умбакыже тергат. Ковидный манме пагытыште регионышкына чылаже 14190 еҥ толын, ты чот гыч 68 граждан черле лийын. Августышто Турций, Белоруссий да Азербайджан гыч коронавирусым кондымо 9 случайым регистрироватленыт, сентябрьыште – 10 случайым, ты гана тудым Турций, Грузий да Узбекистан гыч пуртеныт.

Эрла Марий Элыште у коронавирус инфекцийым кондымым да шаркалымым шижтарыме шотышто оперативный штабын заседанийже деч вара регионыштына неле эпидситуацийлан кӧра ешартыш чарак-влакым пуртымо нерген увертарена, каласен А.Евстифеев заседаний мучаште.