Марий Эл вуйлатыше Юрий Зайцев газификаций шотышто федерал штабын заседанийыштыже лийын, тудо РФ правительстве председательын алмаштышыже Александр Новакын вуйлатымыж почеш эртен.
Заседанийын участникше-влак ешарен газифицироватлыме, посна еҥ-влаклан социальный полышым пуымо нерген йодышым видеоконференций йӧн дене каҥашеныт.
Марий Эл ешарен газифицироватлыме шотышто рейтингыште РФ субъект-влак коклаште кумшо верым налеш.
Апрель кыдаллан ончымаште, ешарен газифицироватлышашлан 8045 йодмаш пурен, тушечын 6756 йодмаш почеш 597 ялыште участкын чекше марте газ пучым шупшмо да 5525 суртым сетьыш ушымо.
Ешарен газифицироватлыме программе почеш газым пуртымо яллаште газ пучым мланде участкын чекше марте яра шупшыт. А сурт кӧргыштӧ шуктымо паша суртоза кӱшеш ышталтеш. Марий Элыште ешарен газифицироватлыме годым граждан-влаклан социальный полыш пуалтеш. Льготан тӱшкаш пурышо граждан-влаклан 100 тӱжем теҥге марте тӱлалтеш, тыгак ешарен газифицироватлаш налме кредитын процент ставкыжын ужашыже субсидироватлалтеш.
Марий Элым вуйлатышын пресс-службыжын уверже негызеш Ю.ИСАКОВ ямдылен.
