28 сентябрьыште республик вуйлатыше Юрий Зайцев Марий Эл гыч мобилизоватлыме пӧръеҥ-шамычым военный службыш ужатыме пунктыш миен. Ты мероприятий «Арена Марий Эл» манежыште эрта. Лач тышке частичный мобилизаций почеш еҥ-влакым кондат.
Ю.Зайцев кундемнан тӱрлӧ районжо гыч толшо-влаклан сухой паекым пуымо да регистрацийым эртыме верым ончен лектын. Службыш призыватлалтше-влаклан мо кӱлешым ойырымымат терген. Тылеч вара мобилизоватлыме еҥ-влак дене мутланен, пӧръеҥ-шамычын ешыштлан мо кӱлеш дене полшаш да поддерживатлаш тӱҥалыт, манын.
– Мый лӱмынак тыланда кӱлеш лийше информациян памяткым пуаш йодынам. Те ветеран лийын пӧртылыда, да шкандат, ешландат льгото пуалтеш. Товатлем, тендан лишылда-влак дене чыла сай лиеш. Ӱшанем, чылан пӧртылыда. Ме чылан тендан верч Юмым сӧрвалаш тӱҥалына, – вашлиймаште ойлен Юрий Зайцев.
Регион вуйлатыше кугешнен палемден: Марий Элыште илыше пӧръеҥ-влак призыв деч шылаш огыт тӧчӧ да эл верч кредалаш, лишыл еҥ-влакым аралаш ямде улыт. Службо деч вара пӧръеҥ-влакым эшеат торжественно вашлийыт манын ӱшандарен.
– Пӧртылза, ме тендам вучена. Герой семын вучена. Шкенан элнам аралаш кайымыланда кугу тау. Тыланымаш икте – пӧртылза илыше да таза. Ме тендам вучена, – службыш колтышаш-влаклан манын Юрий Зайцев.
Мобилизоватлалтше еҥ-шамыч регион вуйлатышын ужатыме мутшым кидсовыш да «Урам» кычкырен вашлийыныт. Тыге нуно патырлык да боевой кумылыштым ончыктеныт, шындыме задачым кӱлеш семын шуктен, мӧҥгыш пӧртылаш сӧреныт.
Тыгак Марий Эл вуйлатыше частичный мобилизаций кузе эртымым личный контрольыш налаш сӧрен. Юрий Зайцевын кӱштымыж дене регионышто «шокшо линий» телефон (122) пашам ышта. Тидын дене оператор-влак граждан-шамычлан кӱлеш умылтарымашым пуат. Тыгак частичный мобилизаций шотышто чат-бот-влак улыт.
Чат-бот «Частичная мобилизация в РФ: вопрос-ответ»:
Телеграмhttps://t.me/mobilizatsiyarf_bot
ВКонтактеhttps://vk.com/mobilizatsiyarf_bot
Чат-бот «Ошибки при мобилизации в РФ»:
Телеграмhttps://t.me/oshibkimob_bot
ВКонтактеhttps://vk.com/oshibkimob_bot
Юрий Зайцевын палемдымыж почеш, регионым виктарыме рӱдерлан поручений пуалтын. Тыге Виктор Трифонов частичный мобилизаций шотышто соцсетьлаште увер ден комментарийлам тӱткын эскерымылан вуйын шога. Иктаж нарушений лиеш гын, жапым шуйкалыде, республик вуйлатышылан увертарышаш.
– Кажне сообщенийым индивидуально тергаш да мыланем докладыватлаш. Мобилизоватлыме тӱшкаш пурыдымо еҥ-влакым службыш налаш огыл, – палемден Ю.Зайцев.
Тылеч посна тудо правительствыште улшо еҥ-шамычлан шке отрасльыштышт частичный мобилизаций дене службыш колташ лийше, но производствылан кӱлешан специалист, мастарлыкышт, усталыкышт дене ойыртемалтше граждан-влакын спискыштым ышташ кӱштен.
– Призывной мероприятийым эртарыме годым мыланем мобилизаций почеш службыш виян специалистым налме предприятийлан, фермер озанлыклан кугу экшыкым конда манын ойленыт. Чылажымат систематизироватлынем. Сандене министр-шамычлан ты категорийыш пурышо еҥ-влак шотышто спискым ышташ йодам. Умылем, тиде моткоч кугу паша, но кажне айдеме нерген увер кӱлеш. Тиде мыйын пашаш пурышо экономике дене кылдалтше лӱдыкшыдымылык ужаш, – ончылан шындыме задаче нерген палемден регион вуйлатыше.
Марий Эл Республик вуйлатышын организаций да аналитике виктемын уверже негызеш Е.Эшкинина ямдылен
