Эн сайже «Библиотекыш» пура

Марий Элым вуйлатыше Александр Евстифеев 6 августышто у проект-влакым илышыш шыҥдарыме шотышто стратегический инициативым ончыктышо агентствын сессийыштыже лийын. Тушто республикыште у проект-влакым сайын шыҥдарен толшо практик-влак нерген каласкален, тыгак вес субъект-влакын вуйлатышышт дене пырля каҥашен тєрлышаш пеш кўлешан йодыш ден проблеме-влакым каҥашымашке луктын.

Сессий Казань олаште ўчашен каҥашыме «Точка кипения манме площадкыште эртен, тушто федеральный кучем орган-влакын еҥыштат лийыныт.

Пленарный заседанийым «Стратегический инициативе-влак агентствын» генеральный директоржо Светлана Чупшева почын. Погынышо-влакым саламлен ойлымыж годым тудо тыге каласен: сессийын цельже – икте-весым эн сай решений да социально-экономический практик-влак дене палдарышашлан единый платформым ыштымаш.

Сессийыште Александр Евстифеев ик эн тўҥ докладчикыш савырнен. Тудо порын вашлиймылан Татарстанын президентшылан таум каласен. Российын субъектше-влакын вуйлатышыштым сай лектышыш шуын толшо практик-влак дене палдарен.

Таче каҥашымашке лукмо йодыш-влак коклаште экономике дене кылдалтдымыже уке. Илыме вер, ондалалтше долщик-влак, демографий – чылажат экономике дене чак кылдалтын, палемден Александр Евстифеев.

Кодшо ийыште кўлешан йодыш-влакым ўчашен каҥашыме «Точка кипения» площадке Йошкар-Олаштат почылтын. Тушто каҥашыме деч вара тєрлен кертме йодыш-влак кокла гыч иктыже – ондалалтше долщик-влак нерген йодыш. Республикыште тыгай ондалалтше еҥже шуко огыл, но нуно улыт – 130 еҥ, тышеч 85 еҥже илыме верым налнеже, молышт компенсаций оксам налаш кумылан улмыштым ончыктеныт. Тидлан чылажымат ыштыме: келшен толшо нормативный базым ямдылыме, 2018 ийыште ондалалтше-влаклан компенсацийым тўлымє нерген лўмын законым лукмо. 2020 ий мучашлан мемнан дене ондалалтше ик дольщикат огеш код, каласен республикым вуйлатыше.

Чоҥымо отрасль нерген ойлымыж годым Александр Евстифеев тыге палемден: федеральный полыш толын шогымылан кєра шуко проблемым лишыл жапыште тєрлен кертына, но национальный проектлашке пурыде кодшо да ятыр ресурсым йодшо йодыш-влакат улыт. Тыгай радамыш, мутлан, олаласе коммунальный сетьым уэмдыме пашам пурташ лиеш. Тудым шуко ий олмыктымо огыл, тидыже йўмє вўдын качествыж дене чак кылдалтеш, – каласен Александр Евстифеев.

Марий Элым вуйлатыше тыгак сырьевой проблеме нерген ойлен. Корным ышташ да олмыкташ тыгыде кў кўлеш, тудыжо мемнан дене уке. Сандене тудым Оренбург областьыште налына. Тидыжым декабрьыште, ак шулдештме жапыште, ышташ гын сай ыле, но вийыште улшо законодательстве тидлан йєным огеш пу, палемден Марий Элым вуйлатыше.

Умбакыже Александр Евстифеев республикыште йытыным ончен куштымо, ялозанлыкым вияҥден толмо сай опыт дене палдарен. Пытартышлан тудо тыге каласен: Марий Эл икте-весым паша опыт дене палдарен шогаш, Татарстан Республик да Российын моло субъектше дене поро пошкудо семын кылым умбакыже пеҥгыдемден толаш эреак ямде.

Икте-весым сай опыт дене палдарымаште ме кажне регионын кушкын толмо вий-куатшым ужына. Ме инициативе-влакым илышыш шыҥдарымашке чулымын ушненна, мемнан разработкына-влак дене моло субъектлаштат пайдаланат, палемден каласен Татарстанын президентше Рустам Минниханов.

Россий Федерацийын строительстве да жилищно-коммунальный озанлык министржын алмаштышыже Никита Стасишин «Смартека» ушан решений библиотекын» цельжылан эн сай практик-влакым чумырымаш огыл, а нуным регионлаште лийме семын писынрак шыҥдарымаш шотлалтеш, манын.

Сессий тыгай пунчалым луктын: регион-влакын эн сай практический паша опытыштым кок йєн дене иктыш чумыраш тўҥалыт: онлайн платформо негызеш, тушто тудын дене чылан пайдаланен кертыт, тушто тыгак проект-влакым рейтинг почеш вераҥдыме, наставник семын полшен шогымо системе лиеш. Тылеч посна ончыкыжо ончыл паша опыт дене икте-весым палдарымаш Россий Федерацийын субъектлаштыже почылтшаш тыгаяк дискуссионный площадкылаште эреак эрташ тўҥалеш.