Экономике нерген – чон почын

Марий Элыште Бизнесым вияҥдыме шотышто «Pro.Бизнес-2019» регион кокласе форум эртен. Тудо «Марий Эл – вияҥме кумдык» да «Шукырак ыштен нал – вес эллаш ужале!» маналтше кок форумым иктеш ушен. Тушто Марий Эл вуйлатыше Александр Евстифеев лийын да ойлен.

Форум Москва, Санкт-Петербург, Нижний Новгород, Казань, Киров, Липецк, Магнитогорск, Самара, Саранск да, мутат уке, Марий Эл гыч 600 наре еҥым ушен. Вашлиймашын тӱҥ темыже - изи да кокла кугытан предпринимательствым вияҥдымаш да тудлан кугыжаныш полыш.

Республикым вуйлатыше погынышо-влакым саламлен да палемден: изи да кокла кугытан бизнесын чолгалыкше регионын экономике велым вияҥмаштыже пеш кӱлешан, вет тудо Марий Элыште ыштен лукмо чумыр продуктын 30 утла процентшым пуа. Пашам ыштыше-влак кокла гыч чырык ужашыже ты сферыште тырша, а изи да кокла кугытан предприятий-влакын оборотышт организаций-влакын чумыр оборотышт гыч пелыж нарым айла.

- Регионышто изи да кокла кугытан бизнеслан кугыжаныш велым полшаш сай негызым ыштыме. Кодшо ийын почмо Предпринимательствылан полыш, Социальный сферысе инноваций, Регион кокласе инжиниринг рӱдер-влак тышкак виктаралтыныт. Тиде кечын почылтшаш «Мыйын бизнесем» рӱдерат  «ик окна гыч» манме семын полшаш келыштаралтеш. Лишыл жапыште эше Экспортлан полшышо рӱдер вес элласе рынкыш лекмаште йӧным ышташ тӱҥалеш, - каласен Марий Эл вуйлатыше.

Александр Евстифеев палемден: республикна вес элласе налшыланат шагал огыл темлен кертеш. Шыл продукций шканна кӱлмӧ деч кум пачаш утларак ямдылалтеш, шӧр продукцийнат эн кӱкшӧ качестван. Тылеч посна IT-компаний-влак кӱкшӧ технологиян сатушт дене куандарат.

Форумыш толшо-влакым тыгак РФ Федерал Погынымаш Федераций Советын Тӱнямбал паша шотышто комитетшын председательже Константин Косачев саламлен.

Форум жапыштак икмыняр соглашениеш кидым пыштыме. Тыге вес элла дене экономике кылым вияҥден колтышашлан пырля пашам ыштыме шот дене Марий Эл правительстве ден «Россий Сбербанк» ПАО коклаште соглашений пеҥгыдемдалтын. Тушан регион вуйлатыше Александр Евстифеев ден Россий Сбербанкын Марий Эл отделенийжым вуйлатыше Арсений Колобов кидым пыштеныт.

Тылеч посна Марий Эл правительстве ден Бизнеслан полшымо да вияҥдыме «Предпринимательстве фабрике» фонд коклаште пашам пырля ыштыме нерген соглашений пеҥгыдемдалтын. Правительстве председатель Александр Евстифеев ден «Предпринимательстве фабрике» проектым негызлыше да Казаньысе ты фондын исполнительный директоржо Айдар Булатов палемденыт: пашам пырля ыштымаш Российысе предприниматель-влак дене республикыште кылым пеҥгыдемдаш, торговльым вияҥдаш да инвестицийым кондаш, тыгак  паша вашлиймашым, семинар ден мастер-классым, форумым эртараш полшышаш.

- Тачысе бизнес форум экономикым умбакыже вияҥдыме дене кылдалтын да кучем ден бизнес кокласе паша кылым вияҥдымашке виктаралтын. Регион кокласе бизнес – тиде мемнан пошкудына-влак. Нуно тӱҥ шотышто икгаяк экономике условийыште улыт, сандене мемнан проблемынат икгайракак. Мо нерген таче кутырышаш улына: республикна молын семынак шканже экономике площадкым вияҥдышаш, инвесторым савырышаш да экспорт пашам шарен колтышаш. Вет элнан президентшын кӱштымыж почеш шукталтше национальный проект-влак кокла гыч шукышт лачак тидын негызеш илышыш пурталтшаш улыт, - СМИ представитель-влакын йодышыштлан иктешлыме семын каласен Марий Эл вуйлатыше.