Йошкар-Оласе медицине колледжыште «Сиделке» специальность дене 2000 утла еҥым профессийлан ямдылыме.
Ончыкылык сиделке-шамычым илалше ийготан граждан ден инвалид-влакым кужу жап ончымо системым ыштыме шотышто пилотный проектым илышыш пуртымо кышкарыште туныктымо.
Тыгеже Марий Элыште 2087 еҥым кужу жап ончаш палемдыме.
– Курсышто черле-влакын родыштат, тиде пашам шукташ кумылаҥше-влакат тунемыныт, – каласкала медколледжын квалификацийым нӧлтымӧ отделенийжым вуйлатыше Людмила Воронкова. – Ме нунылан теоретический да практический занятий-влакым темленна. Тӱрлылан: кужу жап ик семын кийымылан кӧра ньыгылгыше верым обработатлаш, кийыше черлын вуйжым мушкаш, вакшыш шартышыжым вашталташ, вес верыш кусараш – туныктенна. Шукыштлан пуымо шинчымашна у лийын. Чылажымат ушыш пыштышт манын, муляж ден у оборудований-влакым, ты шотыштак кийыше пациентым кусаркалаш палемдалтшым, лӱмынак налынна.
Росстатын увертарымыж почеш, 2025 ийлан пашам ыштен кертме ийгот деч кугурак-влак 40,5 миллион наре еҥыш шуыт, чарныде да ойыртемалтшын ончаш кӱлмӧ граждан-шамычынат чотышт кугемеш. Таче сиделкын услугыжо 4 миллион утла илалше еҥлан кӱлеш.
Илалше еҥ ден инвалид-влак кокла гыч шукынжо нужнарак улмыштлан кӧра сиделкым тарлен огыт керт. Сандене, тазалыкысе ойыртемыштым, ешысе ситуацийыштым да врачын темлымыжым шотыш налын, нунылан комплексный социальный полышым адресно пуымо пашам организоватлаш кӱлын.
Кужу жап да квалифицированно ончымо йодышым шотыш кондаш манын, элнан президентше В.Путин илалше еҥ ден инвалид-шамычым кужу жап ончымо пашам организоватлыше рӱдер-влакым почаш задачым шынден. 2019 ий гыч тыгай системым ыштыме шотышто мероприятий-влакым «Демографий» национальный проектын «Кугурак тукым» федерал проектышкыже пуртымо, кужу жап ончымо системын типовый модельжым пеҥгыдемдыме.
Тӱҥ шонымаш – шкем шке ончен кертдыме граждан-влакым социально обслуживатлаш, мӧҥгыштыштат, стационарыштат медицине велым эскераш, тыгак ешыштым лишыл еҥым шке семын ончаш туныкташ.
М.ИВАНОВА
