Марий Эл вуйлатыше Юрий Зайцев Волжск олашке паша дене миен коштмыж годым Рӱдӧ площадьыште да Кугу Отечественный сарыште вуйым пыштыше воин-влаклан шогалтыме памятник-обелиск воктенысе паркыште лийын, пеледышым пыштен.
«Таче оласе кок объектым ончен савырнышым, нуным «Оласе средам йӧнаным ыштымаш» проект почеш тӱзатыме. Салтакна-шамычым шарныме лӱмеш шогалтыме обелиск – тиде бизнес ден кугыжанышын пырля ыштыме пашан лектышыже. Икымше этапше Марий целлюлоз-кагаз комбинат кӱшеш шукталтын, кокымшыжо – каласыме проект кышкарыште», – палемден Юрий Зайцев.
Рӱдӧ площадьым Россий Минстройын ий еда эртарыме VII Всероссийский эн сай проект конкурсышто сеҥымаш почеш тӱзатыме. Федерал бюджет гыч 100 миллион теҥге ойыралтын. Объектым кодшо ий мучашлан ямдылен шуктымо. Тыште йоча площадкым, лӱҥгалтышым, шахмат ӱстелым да молымат келыштарыме.
«Волжск олаште илыше-влак икшывышт дене каналтен, модын, музыкым колыштын кертыт. Российын изи олалаже-влаклан увертарыме конкурсыш ме
тений уэш ушнаш йодмашым колтена», – ешарен регион вуйлатыше.
Юрий ЗАЙЦЕВ:
«Россий президент В.Путинын инициативыж почеш илышыш шыҥдаралтше «Оласе средам йӧнаным ыштымаш» федеральный программе ончыкыжымат кумдык-влакым тӱзаташ полша».
Марий Эл Республикым вуйлатышын пресс-службыжын уверже негызеш Л.Семенова ямдылен
