19 декабрьыште Марий Эл Республикым вуйлатыше Юрий Зайцев Экологий, технологий да атомный надзор шотышто федеральный службын Юл кундемысе управленийжым вуйлатыше Азат Мубаракшин дене вашлийын. Тушто шыже-теле жаплан ямдылалтме да республикын промышленный лӱдыкшыдымылыкшӧ дене кылдалтше йодышлам каҥашеныт.
Регионым вуйлатыше Ростехнадзор дене сайын виктарен колтымо паша, калыклан илашыже йӧным ыштен шогышо да социальный сферысе объект-влакым ямдылыме шотышто план-графикым тӱрыснек шуктымаш сай лектышым пуэн манын палемден. Чыла тыгай объект шыже-теле жапыште пашам ышташ ямде улмым ончыктышо паспортым налын.
Марий Элыште олтымо сезонлан шуко пачеран 5206 пӧртым, 542 котельныйым, шокшым колтен шогымо 699, 5 км пучым, 2655,8 км вӱд пучым да 1130,3 км канализационный сетьым ямдылен шуктымо. Ямдылалтме жапыште котельныйлаште 267 котлоагрегатым капитально олмыктымо але вашталтыме.
Республикыште олтымо сезон сайын эрта. Электроэнергийым ситарен шогымо чыла автономный резерный источник пашам ышташ ямде, нунылан йӱлышӧ да шӱрымӧ материалым ситышын шапашлыме.
Калыклан илашыже йӧным ыштен шогышо да социальный сферысе объектлаште лийын кертше аварный ситуацийым писын кораҥдышашлан ЖКХ организацийлаште чылаже 815 еҥан 197 аварийно-восстановительный бригадым ыштыме.
Вашлиймаште тыгак Марий Эл Республикыште промышленный лӱдыкшыдымылык дене кылдалтше йодышым каҥашыме.
Азат Мубаракшин Ростехнадзорын Юл кундемысе управленийже дене кылым кучымаште проблемный йодыш уке манын каласен.
«Юрий Владимирович, промышленный лӱдыкшыдымылык йодышлан тӱткышым ойырен шогымыланда таум каласынем. Тидыже сай саскам пуа. Пашам сайын виктарен колтымо, ик аварийный ситуацият лийын огыл»,– каласен Азат Мубаракшин.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
