Чыла сита, чыла ямде

Россий субъект-влакын вуйлатышышт дене мутланымаш видеоконференций йӧн дене эртен.

Регионыштына тиде вирус ваштареш кучедалме шотышто ятыр паша ышталтеш. Мутлан, поснак лӱдыкшӧ инфекциян пациент-шамычым транспортироватлаш изолироватлыше боксым налаш республикысе правительствын резерв фондшо гыч окса ойыралтын. Медицине учрежденийлаште эм, маске, аралыше костюм-влак шапаш ышталтын. Аптекылаште да медицине организацийлаште нунын ситымыштым тергыме шотышто мониторинг эртаралтеш. Реанимаций отделений-влакын ямде улмыштымат тергеныт.

                                                                          * * *

 21 мартыште Марий Эл вуйлатыше Александр Евстифеев республик кумдыкыш коронавирус инфекцийым кондымым да тудын шарлымыжым ончылгоч шижтарыме шотышто оперативный штабын черетан заседанийым эртарен.

Роспотребнадзорын Марий Элысе управленийже вуйлатыше, республикын тӱҥ кугыжаныш санитарный врачше Светлана Булатован ойлымыж почеш, 21 мартлан налмаште, Марий Элыште коронавирус инфекциян черлым регистрироватлыме огыл. Тыгодым 427 еҥым медицине велым эскерат. Коронавирус шотышто шымлымашым эртарыме гигиене да эпидемиологий рӱдер кызыт 3 смене дене пашам ышта, тыгодым йӱдымат дежуритла.

Республикын здравоохранений министрже Марина Панькован мутшо почеш, Марий Элыште «инфекциян чер-влак» профиль дене 8 инфекционный стационарыште медицине полыш пуалтеш. Республикыште илыше кажне кумылан еҥ коронавирус дене черланымыж-укеж шотышто яра тергалт кертеш, каласен министр. Тидлан Йошкар-Олаште илыше-шамычлан 2-шо №-ан поликлиникын лабораторийышкыже мияш да анализым сдатлаш лиеш. Районлаште илыше-влаклан тидым ЦРБ-лаштышт ышташ йӧн пуалтын.

Марий Эл вуйлатыше лабораторий кажне кечын пашам ыштышаш манын темлен. Тазалыкым аралыме министр ӱшандарен каласен: 21 март гыч каныш кечылаштат тергалташ лиеш. Тыгак Александр Евстифеев индивидуальный аралалтме средствам медицине пашаеҥ-влаклан веле огыл, тыгак полиций пашаеҥ-шамычланат ситараш кӱштен.

Штабын заседанийыштыже ужалыме рӱдерласе да организацийласе пӧлем-шамычым, общественный транспорт-влакым дезинфицироватлыме шотышто йодышымат каҥашеныт. Тиде паша кызытат пеҥгыдемдыме режим почеш шукталтеш.