Чыла паша шот-ратым йӧрата

Россий президент В.Путинын тӱҥалтышыж почеш, республикыште «Тӱвыра» национальный проект илышыш умбакыже шыҥдаралтеш. Кызыт Марий Турек районысо Кугу Карлыган ялысе тӱвыра пӧртым уэмден чоҥымо паша ышталтеш. 2 сентябрьыште тушто Марий Эл Республикым вуйлатыше Александр Евстифеев лийын.

Ушештарена, оралте 1973 ийыштак чоҥалтын. Тидын марте тудым ик ганат капитально олмыктымо огыл, санденак объект палынак тоштемын. 2015 ийыште уэмден олмыкташ тӱҥалме, но окса ситыдымылан кӧра ты сомыл лугыч лийын. Тений ачалыме паша уэш «ылыжын»: «Ял шотан илемлаште клуб типан тӱвыра-каныме учрежденийлам почмаш (чоҥымаш)» направлений почеш, культур тӧнежым олмыкташ 10 миллион утла теҥге субсидий ойыралтын. Кызыт зданийын тӱжвал тӱсшым уэмдат, олмыктышо-влак кӧргысӧ пӧлемлаште тыршат, мебельымат налаш тӱҥалме.

Тӱвыра пӧртым ончен коштмыж годым Александр Евстифеев тудын сценыжым да залжым сай могырым палемден, но паша эше шуко, садлан планым ыштыме да посна пӧлемлам олмыктымым писынрак ворандараш кӱлмӧ нерген ойлен. «Тӱвыра, печать да калык-влакын пашашт шотышто министр республикын Шочмо кечыжлан районысо калыклан пайрем программым ямдылаш мутым пуэн, правительстве член-влак тиде пайремыш мияш да олмыктымо пашам аклышаш улыт», – каласен тудо.

Тиде кечын регионым вуйлатыше тыгак Советский посёлкышто «Лӱдыкшыдымӧ да сай качестван автомобиль корно» национальный проект почеш паша ышталтмым терген. Районын рӱдыштыжӧ Зелёный да Маяковский уремлаште автомашина-влакын кудалыштме корныштым олмыктымо. Республикын транспорт да корно озанлык министржын обязанностьшым шуктышо Александр Желонкинын мутшо почеш, паша график дене келшышын да сайын ышталтын. А шӱкшакым кышкыме площадкым, нормылан келшышын, район администрацийын вийже дене уэмдыме. Министрын ойлымыж почеш, 6 ийыште Советский районышто чылаже 28 уремыште (чумыр налмаште 26 километр кужыт) корно уэмдалтшаш.

«Мемнан икымше задаче – пашан икмыняр этап дене эртымыжым шарнаш: ончыч – проект, тудым илышыш кӱлеш семын шыҥдарымаш, качествыжым аклымаш да приниматлаш. Кумшо этапын кузе ышталтмыжым шыже ончыкта. Чаманен каласыман, чылаж годым качестве мыланна ок келше, поснак – яллаште. А туштыжо калык сай корным эн чот вуча, но олмыктымо паша тудын ӱшанжым ок суло. Тыге лийшаш огыл. Пашалан объективный акым пуаш манын, кӱлеш годым зависимый огыл эксперт-влакымат ӱжаш лиеш – корным ачалыме шотышто веле огыл, моло объектым чоҥымыланат», – мучашлен Александр Евстифеев каласен.