Марий Элым вуйлатыше Юрий Зайцев правительствын заседанийжым эртарен. Тушто социальный ойпидышым илышыш пуртымо да здравоохраненийын первичный звеножым модернизироватлыме йодыш-влакым каҥашеныт.
Заседанийым тӱҥалме деч ончыч Ю.Зайцев исполнительный кучем орган-влак коклаште эртыше спартакиадыште сеҥыше-влакым палемден.
Регионым виктарыме рӱдерым вуйлатыше Виктор Трифонов республикнан увер кумдыкшо да кучемын регионысо органже-влак ден верысе шкекучемын органже-шамычын «Инцидент Менеджмент» системыште 2022 ий ноябрьыште ыштыме пашашт шотышто оперативный уверым пуэн.
Калык илышым саемдыме шотышто министрын пашажым шуктышо Марина Островская социальный ойпидыш дене кылдалтше йодышым «2021-2023 ийлаште илен лекташ кӱлмӧ окса кугыт деч изи доходан калыкын ужашыжым шагалемдымаш» регионысо программым илышыш пуртымо механизм семын радамлен.
Министрын палемдымыж гыч, Марий Элым Россий Федерацийын тиде пилотный проектым эртарыме субъектше-шамыч радамыш пуртымо. Тений 1 ноябрь марте 2123 социальный ойпидышым ыштыме.
Регионым вуйлатыше социальный полыш мере-влакым кумдаҥдаш кӱлмым палемден да граждан-шамычым социальный ойпидышын механизмже-влак дене палдарыме шотышто пашам умбакыже шукташ задачым шынден.
Марий Элын тазалык аралтыш министрже Марина Панькова здравоохраненийын первичный звеножым модернизироватлыме программым илышыш пуртымо радам дене палдарен.
2022 ийыште программым илышыш пурташ чылаже 377,5 миллион теҥгем ойырымо. Тиде окса дене Медведево районышто Краснооктябрьский врачебный амбулаторийым чоҥымо, Йошкар-Олаште да Волжскышто поликлинике-шамычым ачалыме, кызыт Семёновка врачебный амбулаторийыште олмыктымо паша мучашлалтеш. Тылеч посна регионысо медицине организацийлашке 16 оборудованийым, 28 автомобильым налме. М.Панькован ӱшандарен ойлымыж почеш, палемдыме чыла паша идалык мучаш марте тӱрыснек ыштен шуктымо лиеш.
2023 ийыште 15 медицине оборудованийым налаш, Республиканский клинический больницын офтальмологический консультативно-диагностический отделенийжым капитально олмыкташ да кызыт улшо олмеш ныл объектым чоҥаш палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
