«Оласе средам йӧнаным ыштымаш» федерал проект почеш Козьмодемьянскыште композитор Эшпай лӱмеш скверым тӱзатеныт.
Сеҥышыш лекше проект пашам шукташ федерал бюджет гыч 70 миллион теҥге ойыралтын. Марий Эл вуйлатышын кӱштымыж почеш республик правительстве председательын алмаштышыже Александр Сальников мом ыштымым ончен савырнен. Але марте Я.Эшпай лӱмеш тӱвыра полат ончылно тыглай йолгорно гына лийын гын, кызыт ты кумдык рекреаций зоныш савырнен. Тушто ынде тӱрлӧ пайрем мероприятийымат эртараш, сатумат ужалаш йӧн ышталтын. Скверыште кукшо фонтаным, урно ден олымбалым, йоча площадкым вераҥдыме. Спорт зонышто памп-трек, теннис ӱстел улыт. Тыгак беседке ден арт-объект-влакым келыштареныт. Йолгорнымат олмыктымо, да чыла тидым видео полшымо дене эскераш лиеш.
Тӱҥжӧ – тысе калыклан канаш, яра жапым эртараш тӱрлӧ йӧн ышталтын. Тыгак автомобиль корным лӱдыкшӧ деч посна вончен кошташ лиеш.
Александр Сальников варажым тысе Курымашлык тулым торжественно пашаш колтымо церемонийыште лийын. Тулойыпым Йошкар-Оласе аварийно- утарыше службын еҥже-влак конденыт. Тиде вер республикыштына исторический шарнымашым аралаш полшышо да эре йӱлышӧ кумшо Курымашлык тул лиеш.
Церемоний деч вара Александр Сальников аварийный пӧртлаште илыше да тулык икшыве-шамычлан у пачерлан сравочым кучыктен. Шуко пачашан у пӧртыш 55 еҥ илаш кусна. Тудым ноябрь мучаште пашаш колтеныт. Эше кызыт чоҥалтше у пӧртыштӧ тулык икшыве-шамычланат вич пачерым ойырат.
Парвительстве председательын алмаштышыже А.Сальников у пачерыш илаш пурышо-влакым саламлен. Тидын деч вара эше Чыкма оласе ийготыш шушо самырык ӱдыр-рвезе-влаклан паспортым кучыктен.
Марий Эл вуйлатышын администрацийжын информаций паша пӧлкажын уверже негызеш С.Носова ямдылен
