«Чулымынрак ыштена – писынрак чоҥен шуктена»

«Лӱдыкшыдымӧ да сай качестван автомобиль корно» нацпроект дене келшышын, Йошкар-Олаште Киров урем гыч Строитель уремыш шуйналтше корным чоҥат. Тиде паша кызыт тӱҥалын да ныл ий ышталтшаш. 20 апрельыште чоҥымо верыште Марий Эл вуйлатыше Александр Евстифеев лийын. 

«Марийскавтодор» акционер ушемын генеральный директоржо Евгений Козыревын ойлымыж почеш, тиде корно 4 километр кужытан лиеш. Чоҥымо пашан икымше йыжыҥыштыже 1 километрат 200 метр кужыт корным ыштышаш улыт. Тылеч вара Изи Какшан гоч кӱварым пыштат. Умбакыже коммуникацийым кусараш тӱҥалыт. 

- Кызыт объектыш 163 тӱжем тонн ошмам кондымо. Тудым куп верыш шарена – тыге корным чоҥаш кумдыкым ямдылена, - каласен Евгений Козырев.

- Пашам писын ыштыман. Кузе ме  2020-2021 ийлаште стартым налына, туге пашам мучашлыме жап пале лиеш. Чулымын чоҥаш тӱҥалына гын, кӱчыкрак жапыште ыштен шуктена, - каласен Александр Евстифеев.

Тудо палемден: тиде проектым илышыш пуртымо Сомбатхей ден  Ширяйково микрорайон-влакым ушышо у проспектым ышташ полша. Тыгак Йошкар-Олан рӱдӧ ужашыштыже транспорт шагалрак кудалышташ тӱҥалеш. «Спальный» микрорайон-шамычат утларак вияҥше лийыт. 

- Тиде - стратегический объект. Тудо республикысе рӱдӧ олам вияҥдыме генеральный планым вашталта. Тиде ик микрорайоным вияҥдымаш веле огыл. Ме илыме верым шукырак чоҥышаш улына. А тудым кушто чоҥаш тӱҥалына? Рӱдӧ ужашыште – нигушто. Сандене у микрорайон лиеш. Тиде пашам ыштыман да калыклан ончыктыман, - каласен Марий Эл вуйлатыше Александр Евстифеев.