Чот тыршет – федеральный полышым налат

7 августышто Республикым вуйлатыше Александр Евстифеев Марий Элын чоҥышо отрасльжым вияҥдыме йодыш дене совещанийым эртарен. Мутланымаште чоҥышо компаний, банк учреждений-влакын еҥышт, тыгак келшен толшо министерстве-влакын вуйлатышышт участвоватленыт.

Совещанийыште отрасльын пеш кўлешан йодышыжо-влакым каҥашыме. Погынышо-влак шуктен толмо региональный проект-влакын кышкарыштышт чоҥымо пашаште шуктен толмо мероприятий-влак нерген мутланеныт, республикыште илыме верым чоҥымо йодышым каҥашеныт, тидын годым шуко пачеран пєрт-влакым пай шот дене чоҥымаште эскроу-счётым кучылтмо нерген федеральный законыш пуртымо вашталтышым шотыш налаш кўлмым палемденыт. Тыгак «Илыме вер» федеральный проект дене келшышын социальный ден инженерный инфраструктурын объектше-влакым чоҥымо шумлык ятыр ойым темленыт.

Марий Элым вуйлатыше тыге павлемден: национальный проект-влакым шуктен толмылан кєра республикыште чыла направлений дене кугу паша шукталтеш. Республикысе кучем чылажымат контрольышто куча. Чоҥымо темп элын президентшын кўштен каласымыж дене келшен толшаш. Федеральный полышым налшашлан пеш чот тыршен пашам ышташ кўлеш, палемден Александр Евстифеев.

Илыме верым чоҥымо нерген мутланыме нерген тыге палемдыме: «Илыме вер да оласе среда» национальный проект дене келшышын, 2019-2024 ийлаште республикыште 3 миллион квадратный метр илыме верым чоҥыман. Тений икымше пелийыште 107 тўжем квадратный метр секционный илыме верым да 76 тўжем квадратный метр индивидуальный илыме верым пашаш колтымо.

Александр Евстифеев инфраструктурым да инженерный сетьым ыштыме шотышто ончылгоч сайын шоналташ кўштен. Тудо чоҥышо организаций-влаклан кредитым ойырымо шумлык пашам вияҥден колташ банкын территориальный подразделенийже-влаын вуйлатышыштым ўжын.