Чот тергат да шымлат

Марий Эл – Российын ик регионжо, кушто «Лӱдыкшыдымӧ да сай качестван автомобиль корно» национальный проект почеш чоҥымо годым национальный стандарт кучылталтеш. У пеҥгыде йодмаш дене келшышын, асфальтобетон смесьын чыла компонентше посна оборудоватлыме лабораторийлаште обязательный тергымашым эртат.

17 апрельыште республик вуйлатыше Александр Евстифеев «Марий Эл Дорстрой» акционер ушемыште лийын. Регионыштына корно чоҥымо отрасльыште тудо лидерлан шотлалтеш. Тачысе кечылан предприятий республиканский значениян 3 тӱжем утла километр корным обслуживатла. Тӱҥ подрядчик улмыжым шотыш налын, «Марий Эл Дорстрой» корно шартышым тӧрлатыме да шарыме пашан кузе шукталтме качествыжым чот терга да эскера. Тидлан предприятийыште лӱмын лабораторий ышталтын. Акционер ушемын  генеральный директоржо Александр Карташовын палдарымыж почеш, лабораторий ончычат лийын. Но у национальный стандарт-влакын йодмашышт эшеат кугемме дене пӧлемым у оборудований-влак дене пойдараш ойым пидыныт. Тидлан чылаже 40 млн теҥге ойыралтын.

   Александр Евстифеев лабораторийым ончен лектын да корно полотно гыч образецлан кузе ойырен налме, тергымаш кузе эртаралтме нерген йодыштын да тыгай контрольын кӱлешлыкшым палемден.

Тергымашым эртарымеке да иктешлымашым ыштымеке, документ-влак эн пытартыш решенийым приниматлышашлан «Марийскавтодор» кугыжаныш учрежденийыш колталтыт. Тудынат шке лабораторийже уло да тушто вараже шкешт эше шымлымашым эртарат.

Александр Евстифеев палемден: «Марий Эл Дорстрой пашам кӱлеш семын сайын шукта, сандене ӧпке уке».

Регион вуйлатыше тыгак «Город» МУП-ышто лийын. Тиде предприятий рӱдолам тӱзатыме да корным шотышто кучымо дене кылдалтше пашам шукта. Тудын директоржо Андрей Жуковын каласкалымыж почеш, предприятий чылаже 415 корным (308 километр утла кужытым), 610 тӱжем квадрат метр кужыт тротуарым, 279 остановкым, 13 кӱварым, йолешке-влаклан эрташ 465 переходым, 45 км ливневый канализацийым эскера да шотышто куча.