Москваште эртыше «Россия» тӱнямбал выставке-форумышто «Лишыл – Йӧратыме» всероссийский еш форумышто Марий Элын чапшым аралыше Шернур районысо Купсола ял гыч Шабдаровмыт еш икмыняр номинацийыште сеҥышыш лектын.
Нуно «На все руки мастер» ден «Семейное шоу талантов» конкурслаште икымше вер дене палемдалтыныт. Кокымшыжлан, мутлан, Шабдаровмыт лӱмынак «Еш историй» модыш номер-йомакым ямдыленыт.
«Знатоки Родины» конкурсышто гын шкенан регионын стендше воктене ойыртемалтше да пайдале экскурсийым эртарымыжлан тиде еш «ончышо-влакын симпатийышт» приз дене палемдалтын.
Весымат ойлен кодыман. Российысе мурызо Денис Майдановын ты пайремлан пӧлеклалтше концертыште шке мурыжым йоҥгалтарымыж годым сценыште воктеныже лачшымак мемнан Шабдаровмыт еш шогышт! Тидым интернетыште ончымо годым нунын дене да Марий Элна дене тугай кугу кугешнымаш шижмаш чоным авалтен!
Иктешлыме семын ойлаш гын, «Лишыл – Йӧратыме» всероссийский еш форумыш элнан кажне кундемже гыч чылаже 250 утла еш династий ушнен. А конкурслаште ойыртемалтше еш-влак мӧҥгышкышт шарнымашан пӧлек дене пӧртылыныт.
Л.Камалетдинова
