Марий Эл правительствын оперативный совещанийыштыже регион вуйлатышын пашажым жаплан шуктышо Юрий Зайцев республикысе школлам олмыктымо шотышто йодышлан тӱткылым ойырен.
Образований да науко министр Лариса Ревуцкаян увертарымыж почеш, кызыт ты сомыл куд общеобразовательный организацийыште ышталтеш. Объектлаш ведомствын пашаеҥже-влак тергаш лектын коштыт. Министрын мутшо почеш, подрядчик-влак чоҥымо материалын шергештмыжым палемдат, сандене смете-шамычым тачысе кечылан келшытарыман.
Республикын чоҥымаш, архитектур да илыме вер-коммунал озанлык министрже Михаил Степанов школым концессий ойыпидыш почеш чоҥымо пашам илышыш пуртымо шотышто ойлен. Тиде – Килемар районысо Кугу Памъялыште да Йошкар-Оласе «Юбилейный» микорайонысо «Канде кайык» гимназий. Михаил Степновын мутшо почеш, икымшыштыже пашам тений ноябрьыште мучашлаш палемдыме, а гимназий шотышто кугыжаныш экспертизын иктешлымашыже 2022 ий июльышто лиеш. Кок объектыштат концессионер-влак жап шотышто срокым пудыртеныт. Регион вуйлатышын пашажым жаплан шуктышо тыгай сӱретлан пеҥгыдын вашештен: «Тыге лийшаш огыл. Тидын шотышто права могырым акым пуаш йодам».
Концессий ойпидышым илышыш пуртымо шотышто йодышым Юрий Зайцев шке контрольышкыжо налын.
Марий Эл Республикым вуйлатышын организаций да аналитике виктемжын уверже-влак негызеш Г.Кожевникова ямдылен
