Марий Эл вуйлатышын пашажым жаплан шуктышо Юрий Зайцев ден Киров областьын губернаторжын пашажым жаплан шуктышо Александр Соколов Киров область ден Марий Эл Республик коклаште чекым рашемдыме шотышто ойпидышым ыштеныт.
Кок регионжат субъект-влак колаште чекын вераҥмыж шотышто мутланен келшеныт. Ойпидышыш кидпалым Яранскыште пыштеныт.
- Мыланна тиде моткоч кӱлеш. Киров область дене Марий Эл коклаште чек ик эн кужун шуйналтеш – 550 километр наре, чек воктенысе 6 муниципальный образованийым авалта. Сандене мемнан коклаште кыл сай лийшаш, - палемден Юрий Зайцев.
Александр Соколов шке велым тыгак каласен: Киров областьыште шуко марий ила. Кажныже лач Марий Элым шке шочмо кундемжылан шотла. Тидын нерген кодшо каныш кечылаште этнокультурный организаций вуйлатыше-влак дене вашлийме годымат мутланымаш лийын. Калык-влак кокласе кылым пеҥгыдемдымылан меат кугу верым ойырена. Киров областьысе калык-влак кокласе кыл шотышто советыш Марий Элын представительжат пура.
Юрий Зайцевын ойлымыж почеш, ты ойпидыш кок регион кокласе келшымаш да экономике кылым пеҥгыдемдаш полшышаш.
Марий Эл вуйлатышын организаций да аналитике виктемжын уверже негызеш С.Носова ямдылен
