|
Айдемын праважым пудыртат – аралат
21.03.2014
Марий Эл Республикыште айдемын праваже шотышто уполномоченный И.Татаринова кодшо кугарнян Марий Эл вуйлатышылан шуктымо пашаж нерген икымше отчетшым ыштен.
Тудо ӱмаште регионышто мынярын да могай вуйшиймаш дене лекмышт нерген каласкален, статистике дене палдарен. И.Татаринова палемден: Марий Эл Республикыште айдемын праважым торжан да утыжым чот шуко пудыртымаш огеш вашлиялт.
- Айдемын праваже шотышто уполномоченныйын тӱҥ задачыжлан мый айдемылан нелылык гыч лекташ полшымашым шотлем, - палемден Леонид Маркелов.
А шочмын И.Татаринова журналист-влаклан пресс-конференцийым эртарыш. Тудо тӱҥ шотышто 2013 ийыште шуктымо пашаж дене палдарыш.
Докладын цельже – Марий Элыште илыше, кучем орган-влакым, общественностьым уполномоченныйын пашаж дене палымым ыштымаш. Тушто айдемын праважым аралыме шотышто мо ышталтме нерген каласкалалтеш.
Палемдымыж почеш, кугыжаныш кучем шотышто тӱрлӧ вуйшиймаш дене уполномоченный деке ӱмаште 726 йодмаш пурен. Тышеч 314 еҥже шке йодышыж дене И.Татаринова деке приемыш толын. Утларакше нуно федеральный кучем орган-влак шотышто, тидыже 45-47 процентышкат шуын, лийыныт. Кокымшо верыште – муниципальный кучем орган-влак шотышто. 17 процент наре – региональный исполнительный кучем шотышто ӧпке мут.
Эн шуко вуйшиймаш Йошкар-Ола гыч пурен. Кокымшо верыште – исправительный учреждений-влак. Умбакыже Медведево, Курыкмарий, Звенигово, Юрино район-влак каят.
- Но нине вуйшиймаш-влак тунар тиде але тудо верыште айдемын праважым пудыртымаш утларак вашлиялтме нерген огыл, кунар тушто илыше калыкын шке праважым да тудым аралаш кӱлмым палымыж нерген ойлат.
Мо нерген вуйшиймаш утларак пура? Социальный правам пудыртымо шотышто. Тушеч эн шукыжо – илыме верлан права шотышто, - палемдыш Ирина Сергеевна.
Кокымшо верыште – гражданский але личный права шотышто йодмаш-влак. Тиде - утларакше судын лукмо решенийже дене келшыдыме еҥ-влакын вуйшиймашышт. Тыгайже ӱмаште 66 процент утла лийын. Вашлиялтыныт гражданствым пуымо, политический права шотышто йодыш дене толшо-влак. А теве экологий, шочшо, ава, нунын праваштым аралаш кӱлмӧ дене кылдалтше вуйшиймаш икте-кокыт веле лийын.
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл") |
Айдемын праважым пудыртат – аралат
