Юрий Зайцев Марий Элын Антитеррористический комиссийжын заседанийжым эртарен.
Тушто промышленность объект-влакын терроризм лийме ваштареш мо ышталтме шотышто йодыш-влакым каҥашеныт.
Марий Эл вуйлатышын палемдымыж почеш, Россий президентын Юл кундем федеральный округышто полномочный представительже Игорь Комаровын кӱштымыж почеш, предприятий-влакым терроризм лийме ваштареш утларак аралышашлан мерым ыштыман.
Марий Элын экономический вияҥмаш министрже Станислав Крыловын ойлымыж почеш, нуным аралыме шотышто улшо йодмаш-влак кузе шукталтмым тиде ведомство мониторингым эртарен терга да эскера.
Юрий Зайцев палемден: ты паша кузе шукталтмым эреак контрольышто кучыман. Тылеч посна тудо икмыняр порученийым пуэн.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
