Александр Евстифеев – Юрино районышто

Юркино поселкышто культур пӧрт 1990 ийыште  чоҥалтын. Типовой проект почеш нӧлтымӧ  кок пачашан, 300 веран пӧрт тунам илемым сӧрастарен. Жап эртыме семын тудо тоштемын, капитально олмыктымо паша ик ганат шукталтын огыл. Леведыш гыч вўд витымылан кӧра зданийым аварийный радамыш пуртымо да 2002 ий гыч тудым петырыме. Тылеч вара поселкышто мероприятийлам общеобразовательный школышто да библиотекыште, а кугу  пайрем-влакым уремыште эртараш тўҥалыныт. Верысе калыклан кўлешан улмыжым шотыш  налын, тудым кодшо ийыште «Культур»  нацпроект дене келшышын  капитально олмыктымо. Леведышым олмыкташ 8,5 миллион наре теҥгем ойырымо. Культур пӧрт кӧргыштат вашталтыш лийын: шокшемдыме системым олмыктымо, икымше пачашыште  коридорышто да зрительный залыште кўварым, омсам вашталтыме, пластик окнам шындыме, пӧртончылым уэмдыме.

Александр Евстифеев культур пӧртын пӧлемлажым ончен савырнен да, тусо пашаеҥ-влак дене мутланымек, олмыктымо пашам умбакыже шуяш  темлен.

Регионым вуйлатыше тыгак С.А.Лосев лўмеш Юрино кудалаш  общеобразовательный школышто лийын, тусо педагог-влак дене учебный  заведенийын материально-технический негызшым  пеҥгыдемдыме, йоча-влакым туныктымо да  патриотизм шўлышеш шуарен куштымо нерген  мутланен.

Юринысе школ  республикыште ик эн ончыч ышталтшылан шотлалтеш. Тудо 1932 ийыште негызлалтын да тиде районыштек шочын-кушшо чапланыше журналист-международник да кугыжаныш деятель, ТАСС информационный агентствын  ончычсо генеральный  директоржо Сергей Андреевич  Лосевын лўмжым нумалеш.

Школын кызытсе зданийже 1981 ийыште чоҥалтын. Тушто кызыт 460 тунемше шинчымашым пога. Кодшо ийыште республикын правительствыже  актовый залым олмыкташ 5,7 миллион утла теҥгем  колтен. Отделке пашам шуктымо, леведышым, туврашым олмыктымо, инженерный сетьым да кўварым вашталтыме.