Александр Евстифеев приёмым эртарен

Республикым вуйлатыше Александр Евстифеевын 22 ноябрьыште эртарыме приёмышто еҥ-влакым тургыжландарыше ятыр йодышым тарватыме. Тиде – корным, тротуарым олмыктымаш, тунемше-влакым шупшыктымаш да еҥ-влакым аварийный илыме вер гыч у пачерыш кусарымаш.

Марий Элым вуйлатыше дек приёмыш эн ончыч Йошкар-Олаште илыше Любовь Каяткина пурен. Рўдоласе 7-ше №-ан школышто тунемше кок йочан авам школ кундемысе тротуарым олмыктымо йодыш тургыжландара.

Мемнан олаште «Лўдыкшыдымє да сай качестван автомобиль корно» федеральный программе сайын шукталтеш. Ме тидым икмыняр уремыште, мутлан, Первомайский уремыште лийше вашталтыш гычат ужына. Тидын годымак мемнам, ача-ава-влакым, тротуарым олмыктен тєрлымє йодыш тургыжландара. 7-ше №-ан школ воктене тунемше-влакын коштмо тротуар-влакым олмыктымо да тушто вўд ташлыме дене кылдалтше проблемым тєрлаш лиеш мо манын йодын Любовь Каяткина.

Школ йырысе кундемым тўзатыме да олмыктымо йодышым Йошкар-Олан мэрже Евгений Маслов рашемден ойлен. Тений школ дек Чехов урем велым шуйналтше корным тєрлымє. Шушаш ийыште йолын коштмо верлам тєрлаш, лачшымак каласаш гын, тротуар-влакым изишак нєлталаш, вўдым йоктарен колташ йєным ышташ да тротуар-влакым асфальт дене леведаш палемдыме, каласен олан мэрже.

«Любовь Вячеславовна, телым тыгай паша огеш ышталт, но у тунемме ийлан олмыктен шуктена», – каласен Александр Евстифеев.

Марий Элым вуйлатыше дек приёмыш толшо йошкаролинке Анна Соколоват тиде темым умбакыже шуен. Тудым Пролетарский уремысе корно дене кылдалтше йодыш тургыжландара.

У тунемме ий тўҥалме марте ты уремысе корнылам олмыктен шуктыман, каласен рўдолан мэржылан республикым вуйлатыше. Медведево районысо Томшар ялыште илыше Диана Малинина кўлешан вес йодышым нєлталын. Тудын эргыже Ежово школышто тунемеш. Ача-ава икшывыштым тушко эрдене эрак наҥгаен кодат да кастене гына тушеч налыт. Ава йоча-влакым школыш автобус дене шупшыкташ лийме йодышым рашемдаш ял калык лўм дене йодын. Александр Евстифеев ўдырамашлан тыге каласен: тений республикыш 40 утла школьный автобус толын. Чылажымат латкум районысо образовательный организацийлашке колтымо.

Тачысе кечылан школьный автобус-влакын коштмо маршрутым рашемдыме, диспетчер-влакым туныктена, корнышто лўдыкшє деч посна коштмо шотышто мутым кучышо-влакым туныктымо паша мучашке лишемеш, каласен образований ден науко министрын алмаштышыже Нонна Антоничева.

Марий Элым вуйлатыше йоча-влакым лачшымак кунам шупшыкташ тўҥалыда манын йодын. Министрын алмаштышыже У ий каникул деч вара манын вашештен.

Советский районысо Луговой посёлкышто илыше Людмила Домрачева аварийный илыме вер гыч вес верыш илаш кусарыме шотышто полшаш Александр Евстифеев деч йодын.

Мемнан посёлкына Солнечный посёлко деч 9 километр тораште верланен. Тушто почтат, кевытат уке, икшыве-влакым йочасадыш да школыш Солнечный посёлкыш шупшыктена. Мемнан пєртым да воктенак верланыше вес пєртым 2016 ий декабрьыште аварийныйлан шотлымо. Тушто илыше еҥ-влаклан полшаш йодына, каласен Людмила Домрачева.

Йодышым тўткын колышт лекмек, Марий Элым вуйлатыше тыге каласен: 2017 ий 1 январь марте аврийныйлан шотлымо илыме вер фонд гыч еҥ-влакым вес верыш кусарыме паша 2019-2025 ийлаште «Граждан-влакым аварийный илыме вер фонд гыч вес верыш кусарымаш» республиканский адресный программе дене келшышын шукталтеш. Луговой посёлкысо 1-ше №-ан пєрт 2020 ийыште пытаралтшаш пєрт-влак радамыш пурталтын.

Еҥ-влак дене вашлийын мутланымашым мучашлышыжла, Александр Евстифеев тарватыме йодыш-влак шотышто мутым кучышо еҥ-влаклан ятыр порученийым пуэн, сєрымым жапыштыже шукташ кўлмым палемден.