|
Ак кум теҥгелан шулдештеш!
24.01.2020
Тений
1 февраль гыч Йошкар-Олаште общественный транспорт дене пайдаланымылан да ик
вер багажлан кеч-могай йӧн денат 19 теҥгем тӱлыман. Але марте ты кугыт 22 теҥге
лийын. Лимитдыме проездной билетын акшат ынде 1200 теҥге огыл, а 1000 теҥге
лиеш.
Тидын нерген Марий Эл вуйлатыше Александр Евстифеев дене вашлиймаште Йошкар-Олан мэрже Евгений Маслов увертарен. 1 январь гыч, акцийым эртарен, акым волтеныт да еҥ-влакын олаште веле огыл, Медведево поселкышто илыше-шамычынат троллейбус дене кузе пайдаланымыштым онченытат, тыгай ойым пидыныт, палдарен рӱдола вуйлатыше. - Троллейбус паркыште сӱрет моткоч уда лийын. Тудо панкрут радамышкат лишемын. Тышеч регионысо правительствын полшымыж деч посна лукташ огеш лий гаяк ыле. Оксам ойырымо дене предприятийын пашаже воранен толеш. Тудлан тыгак Москва гыч кондымо троллейбус-влакат чот полшеныт. Тиддеч посна предприятийлан илен лекташыже нелырак лиеш ыле, - палемден олан мэрже. Марий Эл вуйлатыше вашке сад-пакча пагыт шумо нергенат ушештарен да ола администрацийлан республикысе Транспорт министерстве дене пырля пассажир-влакым шупшыктымо йодышым каҥашаш темлен. |
Ак кум теҥгелан шулдештеш!
