740 икшывылан кум йочасад почылтеш

Республикысе Правительстве пӧртыштӧ эртыше паша вашлиймаште Марий Элым вуйлатыше Александр Евстифеев ден Йошкар-Олан мэрже Евгений Маслов регионын рӱдолаштыже социальный могырым кӱлешан объектлам чоҥымо шотышто каҥашеныт.

Эн ончыч нуно шушаш тунемме идалыклан образовательный тӧнеж-шамычым ямдылыме нерген мутланеныт. Мэрын мутшо почеш, национальный проектым илышыш пуртымо пашам оласе калык шкеак эскерен кертеш. Мутлан, 9-ше микрорайонышто школым нӧлтымымак налаш – пытартыш 30 ийыште тушто тыгай тунемме верым чоҥымо огыл. 825 верлан объектым кызытеш леведме ыштыме, школым шушаш ийын сдатлышаш улыт.

«Ача-ава-влак йочасадлаште верым вучат. Тидын шотышто сӱрет могайрак?» – йодын регионым вуйлатыше.

Евгений Масловын вашмутшо почеш, тений 1 сентябрьлан «Восточный» микрорайонышто 320 верлан йочасад ямде лийшаш. Тидын деч посна Карл Либкнехт уремыште верланыше 49-ше №-ан йочасад пелен 100 верлан ешартыш зданий чоҥалтеш, тудо октябрь мучашлан ямде лиеш. Тыгак «Интеграл» микрорайонышто 2019 ий 1 декабрьыште 320 верлан дошкольный учреждений почылтеш. Чумыр налмаште тений икшыве-влаклан 740 ешартыш вер лийшаш. Кызыт Йошкар-Оласе «Мирный» микрорайонышто да Гагарин проспектыште эше кок йочасадым чоҥаш ямдылалтыт.

Марий Элым вуйлатыше тиде паша вашлиймаште Ната Бабушкина скверым уэмдыме олмыктымо шотыштат йодышым тарватен. Мэрын увертарымыж почеш, ты пашам мучаш марте шуктымо. 16 июль гыч тушто каныше калык Wi-Fi услуго денат пайдаланен кертеш. «Тидым Инвалид-влакын III всероссийский спартакиадышкышт толшо уна-влакат кӱкшын акленыт», – манын мэр.

Александр Евстифеев Йошкар-Ола уремлаште тыршыше службо-шамычын пашаштым сай могырым палемден. «Спартакиаде годым рӱдолаштына 2,5 тӱжем уна лийын. Иктат нимогай замечанийым ыштен огыл, мӧҥгешла, ола яндар манын ойленыт. Айста управляющий компаний-влак деч умбакыжат тыгак пашам ышташ йодына», – манын тудо.

Тротуар да корно сеть шотышто мут лекмеке, Евгений Маслов каласен: «Паша умбакыже шуйна. «Лӱдыкшыдымӧ да сай качестван автомобиль корно» национальный проектлан кӧра корным уэмден олмыктымо паша сайын кая – ӱмашсе тыгаяк жап дене таҥастараш гын, тений ачалыме кумдык кум пачаш кугу».