Республикын Чоҥымо паша, архитектур да илыме вер ден коммунал озанлык министерствыжын коллегийыштыже отрасльын эртыше ийысе пашажым иктешлыме. Тушто Марий Эл вуйлатыше Юрий Зайцев лийын.
Кодшо ийын республикыште федерал да регионал программе ден проектла негызеш чылаже 5,5 миллиард утла теҥгеаш 190 утла объектым чоҥымо да пужен ыштыме. Тидыже Россий президент ден правительствын полышышт деч посна ышталтын огыл, палемден Марий Эл вуйлатыше.
Ӱмаште 530 тӱжем утла квадратный метр илыме верым чоҥен шуктымо – тидыже республиклан рекорд шотан показатель. Ты пашам умбакыже вияҥден толаш кӱлеш, каласен Юрий Зайцев. Тыгак Запорожье областьысе Куйбышевский районышто социальный кӱлешан объектлам олмыкташ республикын полшымыжым сай велым палемден.
Чоҥымо пашан ушнен толмыжо чоҥышо-влакын тыршымышт дене чак кылдалтын. Санденак Марий Эл вуйлатыше чоҥышо-влаклан у сеҥымашым тыланен да тауштымашан серышлам кучыктен.
Коллегийыште тыгак чоҥымо паша, архитектур да илыме вер ден коммунал озанлык министр Наталья Ошланован, Марийскгражданпроект – Тӱҥ проект институтын генеральный директоржо Алексей Черваковын, Проект документаций ден инженер шымлымаш результат кугыжаныш экспертизе управленийын начальникше Лев Зверевын докладыштым колыштмо.
Марий Эл вуйлатышын пресс-службыжын уверже негызеш Ю.Исаков ямдылен
