Марий Элыште 2024 ий 1 сентябрьлан кок у школ омсажым почеш.
Тунемме вер-влакым чоҥымо пашан кузе эртымыж нерген регионым вуйлатыше Юрий Зайцевлан республикын образований да науко министрже Лариса Ревуцкая палдарен.
Ушештарена, «Образований национальный проект дене келшышын, у школ-влакым Йошкар-Оласе «Восточный» микрорайонышто да Медведево районысо Руэм посёлкышто ыштат. Ты пашалан чумыр налмаште кок миллиард утла теҥгем ойырымо.
Лариса Ревуцкаян мутшо почеш, «Восточный» микрорайонышто чоҥалтше объектыште икымше пачашым ыштат. А Руэм посёлкышто свайым кырат, фундаментым ямдылат, икымше пачашын пырдыжшым опташ ямдылалтыт.
Марий Элым вуйлатыше палемден: нине кундемыште улшо школлаште йоча-влаклан вер ок сите, сандене чоҥымо паша жапыштыже ышталтшаш. «Мемнан задаче – вес тунемме ий сентябрь гыч у тунемме вер-шамыч ямде лийшаш улыт. 2024 ийын икымше пелыштыже отделке пашам тӱҥалман, мебельым да техникым налман. Йоча-влаклан шинчымашым налаш да педагог-шамычлан туныкташ сай йӧным ыштыман, эркын дене кокымшо смене деч кораҥман. У школ-шамычым чоҥымо пашам, а моло вере капитально олмыктымо сомылым контрольышто кучаш йодам», – каласен тудо.
Марий Эл вуйлатышын администрацийжын информаций паша пӧлкажын уверже негызеш Г.Кожевникова ямдылен
