Марий Эл вуйлатыше Александр Евстифеев теҥгече Россий Федерацийыште региональный вияҥмаш шотышто правительственный комиссийын президиумжын заседанийышкыже ушнен. Тудым Россий правительстве председательын алмаштышыже Марат Хуснуллин эртарен.
Марий Эл вуйлатыше Александр Евстифеев элын вице-премьержылан инфраструктур проект-влакым ойырен налмашке ушнаш йодмашым пуымыж нерген каласен. Тидым Марат Хуснуллин сайлан шотлен.
Инфраструктурный бюджетный кредитым налаш палемдыме кугыт 472,3 млн. теҥге. Тиде окса дене Йошкар-Ола ден Медведево поселко коклаште Черняков уремыште рекреационный кумдыкым ышташ палемдалтеш. Тушто паша 2024-2025 ийлаште кок йыжыҥ дене шукталтшаш. Проектын тӱрыс бюджетше – 11,9 млрд. теҥге.
Тыгак Российын Чоҥымаш министерствышкыже 5 троллейбусым налшаш шотышто инфраструктурный проектлан оксам ойыраш йодмашым колтымо.
Корным чоҥымаш дене РФ субъект-влак коклаште Марий Эл тугак ончыл радамыште. Россий правительствын «светофоржо» дене келшышын, 25 апрельлан республике 6-шо верыште.
«Лӱдыкшыдымӧ да сай качестван корно» национальный проект дене келшышын, тений региональный значениян 246 км. автомобиль корным да Йошкар-Ола агломерацийыште 13,5 км. кумдыкым тӧрлатышаш улыт.
Яллаште корным чоҥымо нерген ойлаш гын, «Ял кумдыкым комплексно вияҥдымаш» кугыжаныш программе дене келшышын, кок вере автомобиль корным нӧлташ контрактым ыштыме. Нунын кужытышт 4,2 километр лийшаш. Иктыже, 1,825 км, Морко районысо Курыкӱмбал ял марте шуйналтшаш. Тудым тений 31 август марте ыштен шуктышаш улыт. Весыже – Морко районыштак 2,4 км кужытан корно Шлань гыч Шӱргӧ марте лийшаш. Тушто пашам тений 31 октябрь марте мучашлышаш улыт.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен
