Марий Элыш Юл кундем округысо 14 субьект гыч пожарно-утарыше спорт дене таҥасыше-влак погыненыт.
Таҥасымашым Марий Эл вуйлатышын пашажым жаплан шуктышо Юрий Зайцев почын. Нуным саламлышыла тудо утарыше-влакын пашаштын кӱлешлыкыштым палемден. «Шуктымо пашада куштылго огыл, вийым, лӱддымылыкым, ончыко каяш тыршыме койышым, командыште пашам ыштен моштымым тудо йодеш, сандене тыланда сеҥымаш верч кучедалмаште чыла нине койышым ончыкташ тыланем», – каласен тудо.
Юрий Зайцев Россий МЧС-ын республикысе Тӱҥ управленийыжын ойыртемалтше пашаеҥже-влакан, РФ Президентын указше дене келшышын, «За отвагу на пожаре» медальым кучыктен. Палемдалтше-влак коклаште внутренний службын подполковникше Юрий Прыгунов ден старший сержант Иван Куракин лийыныт.
Марий Элын Тӱҥ федерал инспекторжо Павел Волков РФ Президентын Юл кундемысе федерал округышто полномочный представительже Игорь Комаровын саламлымашыжым лудын пуэн.
Россий МЧС-ын республикысе Тӱҥ управленийжым вуйлатыше Виктор Шангинат палемден, таҥасмашын кажне участникше Российын чапшымат арален кертеш. Таҥасмыаш 2 июль марте шуйна. Тушто чылаже 310 еҥ участвоватла. Марий Элын сборныйышкыжо 20 спортсмен пурен. Нунын коклаште спортын 4 мастерже да ик еҥ спорт мастерыш кандидат.
Марий Эл вуйлатышын Организаций да аналитике виктемжын уверже негызеш С.Носова ямдылен
