100 ий дене саламлена! Тудын илыш корныжо – элын «илыш корныжо»

У Торъял поселкышто илыше Мария Леонтьевна Роженцовалан 6 июльышто 100 ий темын.

Курымаш юбилейже дене Кугу Отечественный сарын ветеранжым, аэростатчицым Марий Эл вуйлатыше лӱм дене правительстве председательын алмаштышыже Илга Дравниеце, Степан Воронцов да социальный вияҥмаш министр Ольга Федорова саламленыт.

Шке саламлымаштыже Александр Евстифеев Мария Леонтьевнан заслугыжым палемден да каласен: тудын илыш корныжо – тиде ик ешын историйже гына огыл, а уло элын историйже.

Юбилейым Мария Роженцова родыжо да лишыл еҥже-влак коклаште вашлийын. Ятыр пеледыш аршаш дене пырля илалше еҥлан шуко пӧлекым кучыктеныт. Но, шкенжын палемдымыж почеш, тудлан эн кугу пӧлек – уло ешыжым иктеш чумырымаш. А ешыже Мария Леонтьевнан кугу. Тудын 6 шочшыжо, 10 уныкаже да нунын 12 икшывышт улыт.

Мария Леонтьевна Масканур ял шотан илемыш пурышо Шестаково ялыште шочын. Ешыште шым йоча гыч тудо кокымшо лийын, сандене паша шуко логалын. Школ деч вара ӱдыр шочмо колхозыштыжо тыршен. Тунамак ончыкылык пелашыже Геннадий Домрачев дене палыме лийыныт да икмыняр жап гыч мужыраҥыныт. 1941 ийыште марийжым армийыш наҥгаеныт. А 1942 ий ноябрьыште 23 ияш Мариямат тушкак налыныт.

Самырык ӱдырамашлан сар 1946 ийыште мучашлалтын. Тудым Москваште кодынешт улмаш, пачерымат пуаш сӧреныт, но тудын шочмо кундемышкыжак толмыжо шуын. А 1946 ий 3 сентябрьыште марийже колымо нерген увер толын.

Сар гыч пӧртылмеке, Мария уэш колхозышто тыршаш тӱҥалын. Туштак Сергей Николаевич Роженцовын шинчашкыже пернен да пӧръеҥ тудым Мосино ялышкыже наҥгаен. Тушто ончыкылык пелашыже апшатлан тыршен.

1975 ийыште Роженцовмыт У Торъял поселкыш илаш кусненыт. Мария Леонтьевна верысе райпошто пашам ышташ тӱҥалын.

Кызытат 100 ияш ковай тугаяк кодын: поро да шыргыжаш йӧратыше. Ынде тудо икшывыж ден уныкаже, уныкаже-шамычын шочшыштын куаныштлан йывыртен ила.