12 мартыште Тӱвыра, савыктыш да калык-влакын пашашт шотышто министерствын коллегийжын заседанийже эртен. Тушто Марий Эл вуйлатыше Юрий Зайцев лийын.
Мероприятийын пайремлын почылтмыж деч ончыч Ю.Зайцев Марий книга издательствын савыктен лукмо книгаже-влакым выставкыште ончен савырнен. Регион вуйлатыше палемден, Россий президент Владимир Путинын темлымыж почеш илышыш пурталтше «Тӱвыра» национальный проект республикыште сайын шукталтеш. Инвестиций кугытшо 1,5 миллиард теҥгем эртен.
«Пытартыш жапыште Марий Элыште модельный манме 8 библиотекым почмо, 6 йоча сымыктыш школым, ялласе 14 тӱвыра пӧртым пужен ыштыме. Яков Эшпай лӱмеш Марий кугыжаныш филармонийын зданийжым чоҥымо, Юрино посёлкышто Геннадий Павлович Лосев лӱмеш историко-художественный музейыште ачалыме пашам шуктымо», – каласен республик вуйлатыше.
Юрий Зайцев ешарен: республикыштына Келшымаш пӧртым почмо, тыгак национальность-влак пӧрт, Креатив индустрий школ-влак, сымыктыш да тӱвыра кластер пашам ыштат. Курчак театрын ончычсо оралтыжым Марий самырык театрлан, Волжск оласе «Родина» кинотеатрым йоча сымыктыш школлан келыштарен пужен ыштыме паша умбакыже шуйна.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов 2024 ийыште министерствын ыштышаш пашаж дене палдарен. Тудын мутшо почеш, пашан тӱҥ корныжлан эл вуйлатышын Федерал Погынымашлан колтымо посланийжым да «Тӱвыра» нацпроектым, тыгак Ешын идалыкше дене кылдалтше мероприятийым шуктымаш шотлалтеш.
2024 ийыште отрасльым финансироватлаш республикын бюджетше гыч 2,6 миллиард теҥгем ойырымо, «Тӱвыра» нацпроектым илышыш шыҥдарашлан – 691,6 миллион теҥгем.
Тений ялласе 5 тӱвыра пӧртым да М.Н.Янтемир лӱмеш сылнымут да этнографий тоштерым уэмден олмыктышаш, кум тоштерыш у оборудованийым, ныл сымыктыш школлан семӱзгар ден тунемме материалым налшаш улыт. Тыгак модельный кум библиотекым ышташ палемдыме.
Йошкар-Олаште Российысе финн-угровед-влакын шанче конференцийыштым, Марий калык погыным, Медведевыште Сабантуйым эртарен колтымылан ямдылалтме паша шукталтеш. К.Ивановын палемдымыж почеш нине кӱлешан событий-влакым республикыштына кӱкшын эртарен колтышаш улына. Юрий Зайцев тӱвыра пашаеҥ-влаклан профессийыштым сайын шуктымыштлан тауштен да ойыртемалтше-влаклан наградым кучыктен.
Марий Эл вуйлатышын пресс-службыжын уверже негызеш А. Байкова ямдылен
