Республик вуйлатыше паша визит дене У Торъял районыш миен.
Юрий Зайцев райрӱдыштӧ чоҥен шуктымо физкультурно-тазаҥдарыме комплексым ончен савырнен.
ФОК-ым эше 2011 ийыштак нӧлташ тӱҥалыныт, но тунам ыштен шуктен огытыл. Пашам уэш пытартыш ийлаште веле шуеныт. Палемдымым Марий Эл правительствын полшымыж дене мучаш марте шуктен кертме. Тиде комплекс кужу жап чоҥалтшылан шотлалтын. Тудым «Демографий» нацпроектын «Спорт – илыш нормо» федеральный проектышкыже пуртеныт.
Кум пачашан тиде ФОК-ышто спортзал, 25 метр кужытан бассейн, ӱстембал теннис дене модаш да кучедалаш зал-влак лийыт. Чоҥымо да монтаж пашам приниматлымеке, тиде комплекс Марий Элын казнашкыже кусна.
Юрий Зайцев У Торъял районышто тыгай спорт сооруженийым почмын кӱлешлыкшым палемден.
– Тиде – уло районлан сай пӧлек. Тыште илыше-влак вашке тушко кошташ тӱҥал кертыт. Спорт дене тӱшкан кылым кучаш тыгай сынан учреждений-влак лишне верланышаш улыт, – каласен республик вуйлатыше.
* * *
У Торъял районышто лиймыж годым Юрий Зайцев «Первый Май» колхозыш миен.
Тиде озанлыкыште 504 вуй ушкаллан комплексым чоҥеныт. Тушто нуным йолыштыде шогыктат. Комплексым 2022 ийыште чоҥаш тӱҥалыныт. Проект почеш 291 млн. теҥге инвестиций окса кучылталтын.
Марий Элым социально-экономически вияҥдымаш индивидуальный программе дене келшышын 2023 ийыште предприятийлан 13,2 млн. теҥге кугыжаныш полыш окса техникым да оборудованиймы налаш кучылтымо роскот ужашым петыраш пуалтын.
«Первый Май» колхоз – республикыште ик эк кугу ялозанлык предприятий. Шӧрым лӱштымӧ дене республикыште – кокымшо верыште. 2023 ийыште чылаже 154 млн. теҥгеаш 82 единице ялозанлык техникым да оборудованийым налын. Тыгодым озанлыклан 2023 ийыште 63 млн. теҥге кугыжаныш полыш пуалтын.
Юрий Зайцевын палемдымыж почеш, тыгай предприятий-влак республикын кочкыш лӱдыкшыдымылыкшӧ шотышто да шке куатым шарыме дене у паша верым ыштымаште тӱҥ рольым модыт.
2020-2021 ийлаште тыгай инвестиций проект денак тыгай комплекс Чӱксолаште чоҥалтын.
Марий Эл вуйлатышын пресс-службыжын уверже негызеш Л. Камалетдинова ямдылен
