Марий Элым вуйлатыше Юрий Зайцев Ялозанлык да кочкыш сату министерстве коллегийын заседанийыштыже лийын. Тушто республикын агропромышленный комплексшын эртыше ийысе пашажым иктешлыме да 2024 ийлан задачым палемдыме.
Регион вуйлатыше отрасльын вияҥмыжым палемден да каласен:
– 2023 ийыште, молгунамсе семынак, ялозанлыкыште тыршыше-влак пасу пашам жапыштыже да сай качестве дене эртараш чыла вий-куатыштым кучылтыныт. Пареҥгым, моло пакчасаскам погымо планым эртарен темыме. Вольык озанлык продукцийым ыштен налме кугыт ешаралтеш. Чыла тидыже республикыште илыше-влаклан кочкыш продуктым тӱрыс ситараш йӧным ышта.
Ю.Зайцев ешарен: отрасльлан ошкылым ышташ кушкылым ончен куштымо, шӧрым ыштен налме пашалан субсидийым ойырымо, тыгак 2020-2024 ийлан республикым социально-экономически вияҥдыме индивидуальный программым пеҥгыдемдыме сай корным почыныт. Ялозанлыклан полышым пуымылан кӧра материально-технический базым ятырлан уэмден кертме.
Ялозанлык да кочкыш сату министр А.Кондратенкон ойлымыж почеш, эртыше ийын 59 миллиард теҥгеаш ялозанлык продукцийым ыштен налме. Пакчасаска лектыш шотышто республикна Юл кундем федерал округышто икымше верым налын, Российыште – кокымшым. Пареҥге лектыш дене Юл кундем федерал округышто нылымше да Российыште латшымше верыш лектын.
АПК продукцийым экспортыш колтымо кугыт кодшо ийын 1,6 пачаш ешаралтын да 54 миллион долларыш шуын. Республикым социально-экономически вияҥдыме индивидуальный программылан кӧра 150 паша верым ыштыме. Ял кундем-влакым чыла могырымат вияҥдыме программе кышкарыште индеш проектым илышыш шыҥдарыме, 236 квадрат метр кумдык илыме верым чоҥымо, АПК объектла деке 1,6 километр кужыт корным ыштыме.
Регион вуйлатыше тений шуктышаш задаче нерген ойлымыж годым тидым палемден: ялозанлык техникым налаш республикын бюджетше гыч субсидий ончыкыжымат ойыралташ тӱҥалеш. Тидын деч посна кадрым ямдылыме йодышлан кугу тӱткыш ойыралтеш.
Мучашлан республикым вуйлатыше республикын агропромышленный комплексыштыже тыршыше ончылъеҥ-влаклан наградым да тауштымашан серышым кучыктен.
Марий Элым вуйлатышын пресс-службыжын уверже-влак негызеш В. Смоленцев ямдылен
