Республик вуйлатыше Юрий Зайцев организационный комитетын заседанийжым эртарен. Тудо Марий Элыште Ешын идалыкшылан пӧлеклалтше лийын.
–Тений Марий Элыште посна тӱткыш еш йӱлам аралымылан, икшыван еш-влаклан, ты радамышкак шуко шочшан, ашнаш налше-влакат пурат, полшышашлан ойыралтеш, – каласен Юрий Зайцев.
Заседанийыште палемденыт: республикыште 292 тӱжем еш ила. 10 тӱжем еш шуко шочшанлан шотлалтеш. Нунын кокла гыч 85 процентше – кум икшыван. Регионышто эн кугу еш – лу йочан.
Ешын идалыкше дене келшышын Марий Элыште шуктышаш паша план ышталтын. Тушко чылаже 111 мероприятий пурталтын.
2024 ийыште эн ойыртемалтше событий семын «Лишыл-йӧратыме» региональный еш форум, «Еш команде» спорт еш фестиваль, тыгак кужун келшен илыше еш-влакым саламлымаш лийыт.
8 июльышто, Еш, йӧратымаш да икте-весылан ӱшанле улмо кечын, Йошкар-Олаште, Патриарший площадьыште, моло ийлаште семынак пайрем лиеш. Тыгак «Уло еш дене» всероссийский проект умбакыже шуйна. Марий Эл Республик Вуйлатышын Еш идалыклан пӧлеклалтше грантшым сеҥен налшаш верч, «Путешествуем по Марий Эл» республик кӱкшытан еш фотографий конкурс-влакым эртараш палемдалтеш.
Марий Эл вуйлатышын пресс-службыжын уверже негызеш Л. Камалетдинова ямдылен
