Вы находитесь на новой версии Портала. В настоящее время осуществляется перенос информации со старой версии. Недостающую информацию вы можете найти на соответствующих сайтах старой версии Портала

Жапыштыже да шукырак

Марий Элыште илыме верым чоҥен шуктымаш идалык тӱҥалтышысе деч 1,5 ганалан ешаралтын. Ты показатель дене республикна Россий Федерацийысе ТОП-20 субъект радамыш пурен. Ноябрь кыдаллан данный почеш, регионышто 421 тӱжем квадратный метр илыме верым чоҥымо. Идалыкаш план 110 процент нарылан шукталтын.

Национальный ден федеральный проектла шукталтме йодышымак каҥашыме Россий Федерацийыште Регионлам вияҥдыме правительстве комиссий президиумын заседанийыштыже. Тушто Марий Эл вуйлатыше Юрий Зайцеват лийын. Заседанийым РФ правительстве председательын алмаштышыже Марат Хуснуллин вӱден.

Российын чоҥымо паша да илыме вер ден коммунал озанлык министрже Ирек Файзуллин элна мучко илыме верым мыняр чоҥен шуктымо дене палдарен: «Росстатын данныйже почеш, 87,8 миллион квадратный метр илыме верым чоҥымо, тидыже ӱмашсе деч 21 процентлан шукырак. Регионлаште план тӱрыс налмаште шукталтеш».

Марий Элыште граждан-влакым аварий лӱдыкшан илыме вер фонд гыч кусарыме пашат саемын. Тачысе кечылан аварий лӱдыкшан 56 тӱжем квадратный метр илыме верым кораҥдыме да тушеч 3722 еҥым кусарыме але 2019-2022 ийласе планым 110 процентлан шуктымо.

Республикна моло нацпроектым шуктымо денат ончылно кая. Корным чоҥымо дене элысе чумыр субъект кокла гыч кумшо верым налеш, тыгак «Юлым тазаҥдымаш» федерал проект почеш палемдыме мероприятийым шуктымо денат кум ончыл регион радамыш пура.

Регионал проектла почеш пашам шукташ мыняр средства кӱлеш гын, 95 процентшылан контрактым ыштыме. 2023-2024 ийлан ты паша умбакыже шуйна. Шушаш ийлан кӱлшӧ средства гыч 67 процентшылан контракт ышталтын. Тидыже нацпроектла почеш палемдымым жапыштыже шукташ полша.

Заседанийыште инфраструктур проектлам шуктымо дене кылдалтше йодышымат ончымо. Республикыште тыгай проектше кумыто – Медведево посёлкышто Сеҥымашын 75-ше идалыкше бульвар чоҥалтеш, Медведево посёлко ден Йошкар-Ола кокласе Черняков урем мучко рекреационный кумдык ышталтеш, рӱдола аэропортышто пассажир терминал проектироватлалтеш да нӧлталтеш. Объектласе паша палемдыме жап дене келшышын шукталтеш.


Марий Эл Республикым вуйлатышын организаций да аналитике виктемжын уверже негызеш Ю.Исаков ямдылен