Запорожьеш каеныт

Марий Эл вуйлатыше Юрий Зайцевын темлымыж почеш регионысо тӱрлӧ медицине организаций гыч еҥ-влакым чумырымо кок врачебно-фельдшерский бригаде кодшо кечылаште Запорожский областьыш командировкыш каен.

Тушто нуно ик тылзе лийыт. Тиде жапыште Марий Элын шефствыш налме Куйбышев районышто илыше еҥ-влаклан диспансеризацийым эртарат. Тидлан медицине пашаеҥ-влак пеленышт кок аппаратно-программный комплексым наҥгаеныт. А туштыжо ноутбук, электрокардиограф, глюкометр, холестерин анализатор, шондым шымлаш аппарат, пульсоксиметр, шинча кӧргысӧ давленийым висаш аппарат, тонометр улыт.

Тыгак Марий Эл вуйлатыше Юрий Зайцевын кӱштымыж почеш нине бригаде Куйбышев районысо фельдшер-акушер пунктлаште экстренный да неотложный манме полышым пуаш кӱлшӧ налме эм препарат-влакым, вӱр коштмо системе чер-влакым эмлаш препаратым, ФАП-лаште пашам ыштыше участковый врач ден специалист-шамычлан пайдаланашышт тонометр, глюкометр да пульсоксиметр-влакым наҥгаеныт.


Л.Камалетдинова