Марий Элым вуйлатыше Юрий Зайцев Россий Федерацийысе финн-угор калык-влак ассоциацийын председательже Пётр Тултаев дене вашлийын. Нуно марий калыкын тӱвыражым да йылмыжым вияҥдыме дене кылдалтше йодыш-влакым каҥашеныт, умбакыже вашкылым кумдаҥден пеҥгыдемдыме нерген ойленыт.
Пётр Тултаев палемден: Марий Эл деч уло молан тунемаш, вет таче регионышто марий йылмым увер технологийым кучылтын тунемаш йӧным ыштыме. «Кызыт шочмо (марий) йылме да литератур дене у программым ямдылыме да нуным федеральный перченьыш пуртымо шотышто нелылык уке. Тиде йодыш ятыр жап решатлалтын огыл. Кызыт республик правительстве полшымо дене тиде направленийыште кугу паша ышталтын», – тауштен каласен тудо.
Регионым вуйлатыше мучашлан палемден: «Йылме – калыкын тӱвыражын негызше. Кажне калык пагалымашым сула. Республикым вуйлатыше семын регионышто калык-влак кокласе келшымаш пеҥгыде лийже манын, уло вийын тыршаш тӱҥалам».
***
Тиде вашлиймаш деч ончыч Звенигово район Чакмарий кыдалаш школышто Россий Федерацийысе финн-угор калык-влак ассоциацийын президиумжын черетан заседанийже эртен. Тунемме верыште уна-влакым кинде-шинчал дене вашлийыныт, образовательный организацийым вуйлатыше Владимир Кашков школын Шарнымаш да Чап залже, этнокультур рӱдерже дене палдарен. АФУН председательже Пётр Тултаев Владимир Геннадьевичым, тунемме верын пашаче коллектившым финн-угор тӱняште, Российыште кугу пример улыт манын палемден.
Заседанийыште регионысо кучемын, туныктышо сообществын еҥже-влак дене пырля образовательный организацийлаште шочмо йылмым тунемме, шочмо йылме да литератур дене учебник-влаклан экспертизым ыштыме дене кылдалтше йодышлам каҥашеныт. Экспертизе шотышто теве мом палемдыман: учебник-влакым федеральный переченьыш пурташ эн ончыч лач тудым ыштыман, а тидлан шагал огыл окса кӱлеш. Каҥашымаште лийше-влак чыланат ты пашам ышташ полномочийым регион кӱкшытыш шочмо йылмым да литературым туныктымо сферыште тыршыше специалист-влаклан кусарыме шотышто ойленыт. Лач нуно йылмым, калыкын ойыртемжым эн сайын палат да еҥ-влакат нуным пагалат.
***
Йошкар-Олаште лиймыж годым Пётр Тултаев Марий книга савыктышым вуйлатышын пашажым жаплан шуктышо Игорь Попов, тыгак «Ончыко», «У сем», «Кече» журнал-влакын пашаеҥышт дене вашлийын. РФ АФУН президиумын еҥ-влаклан МЭТР телерадикомпанийыште тудын директоржо Ирина Фоминых ден Марий Эл радион тӱҥ редакторжо Владимир Матвеев телерадиокомпанийыште нунылан экскурсийым эртареныт. Мучашлан уна-влак йӱлаш пурышо поро акцийыштым шуктеныт да нунылан кӧра Республикысе В.Колумб лӱмеш йоча да самырык-влаклан книгагудын фондшо финн-угор литератур дене пойдаралте.
Марий Эл Республик вуйлатышын администрацийжын информаций паша пӧлкажын уверже негызеш Г.Кожевникова ямдылен
