«Йоча-влакым аралыман»

«Йоча-влакым аралыман»
26.07.2021

21 июльышто Марий Эл вуйлатыше Александр Евстифеев уэш «Солнышко» йоча интернат-пӧртыштӧ лийын. Тушто ӱмаште гыч тӱҥалын  кугу ачалыме паша шукталтын.

Тиде социальный учреждений 200 верлан келыштаралтын. Кызыт тушто 170 икшыве ила. Нунын кокла гыч 14 – тулык, 36 ӱдыр-рвезе ача-аван полышышт деч посна кодыныт.

Интернат-пӧртыштӧ ремонтым ышташ 2020 ийыште республикын бюджетше гыч 1,5 млн. теҥге ойыралтын. Тиде окса дене кочмо залым да производство цехлам шотыш конденыт. Ынде кочмыверыште мӧҥгыштӧ гаяк сай веле огыл, эше чылажат йомакысе гай. Молан манаш гын тушко у мебельым вераҥдыме, пырдыжлам тӱрлӧ мультфильм гыч герой-влакын сӱретышт сӧрастарат. Тиддеч посна икшыве-влак кочкаш шолташат тунемын кертыт.

Йоча интернат-пӧртын шокшо цехыштыже лиймыж годым Александр Евстифеев улшо коҥгам вашталташ кӱштен, вет тудын дене кужун пайдаланеныт да ачалаш кӱлмӧ палдырнен.

Тиде социальный учрежденийыште эше окнам, сантехникым вашталтеныт, вӱд ден канализаций пуч-влакым коррозий деч обработатленыт, пырдыжым чиялтеныт, тушко плиткым пижыктеныт. Тыгак спонсор кочмыверын коридоржым олмыктен.

Спортзалыште кугу вашталтыш ышталтын. Республикын социальный вияҥмаш министрже Марина Островскаян регион вуйлатышылан каласкалымыж почеш, йӧнан лийже манын, пӧлемым икмыняр кумдыклан шеледыме да ынде модмо, спорт, реабилитаций, релакс зоно-влак посна-посна улыт. Тушкак жаплан келшыше модмо да вияҥдыше оборудованийым налме. МарГУ ден Йошкар-Оласе художественный училище гыч тунемше ден студент-волонтер-влак спортзалым мультипликаций стиль дене сылнештареныт.

Марина Островскаян мутшо почешак, интернат-пӧртыш тыгак у медицине мебельым, физиотерапевтический, реабилитаций оборудованийлам налын вераҥдыме. Майыште медицине блокын леведышыжым вашталтыме. Республикын бюджетше гыч ремонт пашалан да оборудованийым налаш ӱмаште чылаже 4 млн. наре теҥге ойыралтын. Тений – эше 850 тӱжем теҥге.

Пӧлемлам ончен савырнымеке, Марий Эл вуй латыше республикысе социальный учреждений-влакын материально-технический базыштым саемденак шогаш кӱлмым палемден.

Тыгак, ойлымыж почеш, лишыл жапыште учрежденийын пожар системыжым вашталтыман. Проект-смете пашан акше 2 млн.680 тӱжем теҥгешке шуэш. Регион вуйлатыше поснак кугу тӱткышым пожар лӱдыкшыдымылык шотышто улшо ситыдымашым моткочак писын кораҥдаш кӱлмылан ойырен.

- Йоча-влак тӱрлӧ вучыдымо, чрезвычайный ситуацийла деч аралыман, – каласен Александр Евстифеев.

Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.