Ынде верыштак эмлалташ лиеш

Ынде верыштак эмлалташ лиеш
03.12.2014
Кужэҥер район Кугу Тумньымучаш ялыште у фельдшер-акушер пунктым почыныт.
 
Тудым почмаште Марий Эл Республикым вуйлатыше Л.Маркелов лийын. Республикым вуйлатыше эн ондак медучрежденийым ончен савырнен, вара йошкар тасмам пӱчкын.
 
Ты ФАП - тений республикыште чоҥымо пытартыш медучреждений. Л.Маркеловын мутшо почеш, тений ялыште 16 фельдшер-акушер пунктым почмо. Шушаш ийын эше 20 тыгаяк изи больнице пашашке колталтшаш. Тыгай пунктышто келшыше медполышым налаш йӧн уло. Мутлан, уколым ышташ, давленийым висаш, диагнозым шындаш, физиопроцедурым эрташ лиеш. Сандене эмлымверым чоҥымо программе моткоч кӱлешан.
 
Тумньымучаш ФАП-ым вуйлатыше А.Силина ынде нылле ий чоло шочмо ялыштыже тырша. Антонина Николаевнан мутшо почеш, але марте тыгай келшыше условийыште пашам ышташыже логалын огыл ыле. Вет ончыч пашам ыштыме оралтыште эрдене эн ончычак коҥгашке олташ, таве гыч вӱдым нумалаш пернен.  Ынде У ий вашеш чапле пӧлекым ыштеныт.
 
У медучреждений Тумньымучаш селаште, Кугу Тумньымучаш, Одывлак, Йорош, Пондашсола, Старсела, Лопсола, Нурсола, Эҥервал да Кокшародо яллаште илыше-влаклан, чылаже 1,5 тӱжем еҥлан, медполышым пуаш тӱҥалын. Лишыл кок ийыште ты районысо Руш Шой да Руш Кугунур селалаште тыгаяк ФАП-ым чоҥаш палемдыме.
 
Марий Эл Республик Вуйлатышын мер кыл ден увер виктемже
Кусарымаш - В.Смоленцев (газет "Марий Эл")