Ынде шкенан денак эмлалтына

«Здравоохранений» национальный проектын «Россий Федераций здравоохраненийын первичный звеножым модернизироватлымаш» регионысо проектшым илышыш пуртымо кышкарыште Республиканский клинический больницын офтальмологический поликлиникыжым капитально олмыктымо.

30 январьыште тушко Марий Элым вуйлатыше Юрий Зайцев миен да регистратурым, кабинетлам, лазерный операционныйым, тыгак йоча отделенийым ончен.

– Зданийым 1976 ийыште чоҥымо да капитально ик ганат олмыктымо огыл, сандене тудо йӧндымыш савырнен. Икмыняр программын кышкарыштыже оралтым олмыктышна, кызытсе жаплан келшыше оборудованийым нална. Тымарте калыкым южо диагностике процедур шотышто Москвашке колташ логалын, ынде пациент-шамыч шкенан республикыштак эмлалтын кертыт. Йоча-шамычым эмлашат сай йӧным ыштыме, – поликлиникым ончен савырнымыж деч вара манын Ю.Зайцев.

Офтальмологический поликлинике ик сменыште 250 пациентым приниматлен кертеш, тыгак республикысе калыклан вес жапыш кусараш лийдыме да ончылгоч палемдыме полышым пуа.

Зданийым тӱжвачынат, кӧргӧ гычынат олмыктымо, келшышын кыдежлыме, инженер коммуникацийым шотыш кондымо, окна ден омса блок-влакым вашталтыме. Олмыктымо пашалан 35 миллион утла теҥгем кучылтмо. Республикын бюджетше гыч ойырымо 2,2 миллион теҥгелан мебельым налме.

Олмыктымо деч вара амбулаторно-поликлинический службо тӱрыснек ик верыште пашам ышта.

Ончыкыжым поликлиникын кокымшо пачашыштыже регионысо эндокринологический рӱдерым вераҥдат. Тидлан «Сакыр диабет ваштареш кучедалмаш» федеральный проект почеш 46 миллион теҥгем ойырымо. Рӱдерыште офтальмологический кабинетым почаш, тудлан 32 миллион теҥгеаш 16 оборудованийым налаш палемдыме. Лазерный операционныйыш эше кум лазер аппаратым 13 миллион теҥгелан налме.

Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен